א. עתה תתגדדי בת גדוד מצור שם עלינו בשבט יכו על הלחי את שפט ישראל:
ב. ואתה בית לחם אפרתה צעיר להיות באלפי יהודה ממך לי יצא להיות מושל בישראל ומוצאתיו מקדם מימי עולם:
ג. לכן יתנם עד עת יולדה ילדה ויתר אחיו ישובון על בני ישראל:
ד. ועמד ורעה בעז יהוה בגאון שם יהוה אלהיו וישבו כי עתה יגדל עד אפסי ארץ:
ה. והיה זה שלום אשור כי יבוא בארצנו וכי ידרך בארמנתינו והקמנו עליו שבעה רעים ושמנה נסיכי אדם:
ו. ורעו את ארץ אשור בחרב ואת ארץ נמרד בפתחיה והציל מאשור כי יבוא בארצנו וכי ידרך בגבולנו:
ז. והיה שארית יעקב בקרב עמים רבים כטל מאת יהוה כרביבים עלי עשב אשר לא יקוה לאיש ולא ייחל לבני אדם:
ח. והיה שארית יעקב בגוים בקרב עמים רבים כאריה בבהמות יער ככפיר בעדרי צאן אשר אם עבר ורמס וטרף ואין מציל:
ט. תרם ידך על צריך וכל איביך יכרתו:
י. והיה ביום ההוא נאם יהוה והכרתי סוסיך מקרבך והאבדתי מרכבתיך:
יא. והכרתי ערי ארצך והרסתי כל מבצריך:
יב. והכרתי כשפים מידך ומעוננים לא יהיו לך:
יג. והכרתי פסיליך ומצבותיך מקרבך ולא תשתחוה עוד למעשה ידיך:
יד. ונתשתי אשיריך מקרבך והשמדתי עריך:
טו. ועשיתי באף ובחמה נקם את הגוים אשר לא שמעו:
| 
