א. למנצח לעבד יהוה לדוד אשר דבר ליהוה את דברי השירה הזאת ביום הציל יהוה אותו מכף כל איביו ומיד שאול ויאמר ארחמך יהוה חזקי:
ב. יהוה סלעי ומצודתי ומפלטי אלי צורי אחסה בו מגני וקרן ישעי משגבי:
ג. מהלל אקרא יהוה ומן איבי אושע:
ד. אפפוני חבלי מות ונחלי בליעל יבעתוני:
ה. חבלי שאול סבבוני קדמוני מוקשי מות:
ו. בצר לי אקרא יהוה ואל אלהי אשוע ישמע מהיכלו קולי ושועתי לפניו תבוא באזניו:
ז. ותגעש ותרעש הארץ ומוסדי הרים ירגזו ויתגעשו כי חרה לו:
ח. עלה עשן באפו ואש מפיו תאכל גחלים בערו ממנו:
ט. ויט שמים וירד וערפל תחת רגליו:
י. וירכב על כרוב ויעף וידא על כנפי רוח:
יא. ישת חשך סתרו סביבותיו סכתו חשכת מים עבי שחקים:
יב. מנגה נגדו עביו עברו ברד וגחלי אש:
יג. וירעם בשמים יהוה ועליון יתן קלו ברד וגחלי אש:
יד. וישלח חציו ויפיצם וברקים רב ויהמם:
טו. ויראו אפיקי מים ויגלו מוסדות תבל מגערתך יהוה מנשמת רוח אפך:
טז. ישלח ממרום יקחני ימשני ממים רבים:
יז. יצילני מאיבי עז ומשנאי כי אמצו ממני:
יח. יקדמוני ביום אידי ויהי יהוה למשען לי:
יט. ויוציאני למרחב יחלצני כי חפץ בי:
כ. יגמלני יהוה כצדקי כבר ידי ישיב לי:
כא. כי שמרתי דרכי יהוה ולא רשעתי מאלהי:
כב. כי כל משפטיו לנגדי וחקתיו לא אסיר מני:
כג. ואהי תמים עמו ואשתמר מעוני:
כד. וישב יהוה לי כצדקי כבר ידי לנגד עיניו:
כה. עם חסיד תתחסד עם גבר תמים תתמם:
כו. עם נבר תתברר ועם עקש תתפתל:
כז. כי אתה עם עני תושיע ועינים רמות תשפיל:
כח. כי אתה תאיר נרי יהוה אלהי יגיה חשכי:
כט. כי בך ארץ גדוד ובאלהי אדלג שור:
ל. האל תמים דרכו אמרת יהוה צרופה מגן הוא לכל החסים בו:
לא. כי מי אלוה מבלעדי יהוה ומי צור זולתי אלהינו:
לב. האל המאזרני חיל ויתן תמים דרכי:
לג. משוה רגלי כאילות ועל במתי יעמידני:
לד. מלמד ידי למלחמה ונחתה קשת נחושה זרועתי:
לה. ותתן לי מגן ישעך וימינך תסעדני וענותך תרבני:
לו. תרחיב צעדי תחתי ולא מעדו קרסלי:
לז. ארדוף אויבי ואשיגם ולא אשוב עד כלותם:
לח. אמחצם ולא יכלו קום יפלו תחת רגלי:
לט. ותאזרני חיל למלחמה תכריע קמי תחתי:
מ. ואיבי נתתה לי ערף ומשנאי אצמיתם:
מא. ישועו ואין מושיע על יהוה ולא ענם:
מב. ואשחקם כעפר על פני רוח כטיט חוצות אריקם:
מג. תפלטני מריבי עם תשימני לראש גוים עם לא ידעתי יעבדוני:
מד. לשמע אזן ישמעו לי בני נכר יכחשו לי:
מה. בני נכר יבלו ויחרגו ממסגרותיהם:
מו. חי יהוה וברוך צורי וירום אלוהי ישעי:
מז. האל הנותן נקמות לי וידבר עמים תחתי:
מח. מפלטי מאיבי אף מן קמי תרוממני מאיש חמס תצילני:
מט. על כן אודך בגוים יהוה ולשמך אזמרה:
נ. מגדל ישועות מלכו ועשה חסד למשיחו לדוד ולזרעו עד עולם:
| 
