א. לדוד בשנותו את טעמו לפני אבימלך ויגרשהו וילך אברכה את יהוה בכל עת תמיד תהלתו בפי:
ב. ביהוה תתהלל נפשי ישמעו ענוים וישמחו:
ג. גדלו ליהוה אתי ונרוממה שמו יחדו:
ד. דרשתי את יהוה וענני ומכל מגורותי הצילני:
ה. הביטו אליו ונהרו ופניהם אל יחפרו:
ו. זה עני קרא ויהוה שמע ומכל צרותיו הושיעו:
ז. חנה מלאך יהוה סביב ליראיו ויחלצם:
ח. טעמו וראו כי טוב יהוה אשרי הגבר יחסה בו:
ט. יראו את יהוה קדשיו כי אין מחסור ליראיו:
י. כפירים רשו ורעבו ודרשי יהוה לא יחסרו כל טוב:
יא. לכו בנים שמעו לי יראת יהוה אלמדכם:
יב. מי האיש החפץ חיים אהב ימים לראות טוב:
יג. נצר לשונך מרע ושפתיך מדבר מרמה:
יד. סור מרע ועשה טוב בקש שלום ורדפהו:
טו. עיני יהוה אל צדיקים ואזניו אל שועתם:
טז. פני יהוה בעשי רע להכרית מארץ זכרם:
יז. צעקו ויהוה שמע ומכל צרותם הצילם:
יח. קרוב יהוה לנשברי לב ואת דכאי רוח יושיע:
יט. רבות רעות צדיק ומכלם יצילנו יהוה:
כ. שמר כל עצמותיו אחת מהנה לא נשברה:
כא. תמותת רשע רעה ושנאי צדיק יאשמו:
כב. פודה יהוה נפש עבדיו ולא יאשמו כל החסים בו:
| 
