א. למנצח לעבד יהוה לדוד נאם פשע לרשע בקרב לבי אין פחד אלהים לנגד עיניו:
ב. כי החליק אליו בעיניו למצא עונו לשנא:
ג. דברי פיו און ומרמה חדל להשכיל להיטיב:
ד. און יחשב על משכבו יתיצב על דרך לא טוב רע לא ימאס:
ה. יהוה בהשמים חסדך אמונתך עד שחקים:
ו. צדקתך כהררי אל משפטך תהום רבה אדם ובהמה תושיע יהוה:
ז. מה יקר חסדך אלהים ובני אדם בצל כנפיך יחסיון:
ח. ירוין מדשן ביתך ונחל עדניך תשקם:
ט. כי עמך מקור חיים באורך נראה אור:
י. משך חסדך לידעיך וצדקתך לישרי לב:
יא. אל תבואני רגל גאוה ויד רשעים אל תנדני:
יב. שם נפלו פעלי און דחו ולא יכלו קום:
| 
