א. מזמור לדוד להזכיר יהוה אל בקצפך תוכיחני ובחמתך תיסרני:
ב. כי חציך נחתו בי ותנחת עלי ידך:
ג. אין מתם בבשרי מפני זעמך אין שלום בעצמי מפני חטאתי:
ד. כי עונתי עברו ראשי כמשא כבד יכבדו ממני:
ה. הבאישו נמקו חבורתי מפני אולתי:
ו. נעויתי שחתי עד מאד כל היום קדר הלכתי:
ז. כי כסלי מלאו נקלה ואין מתם בבשרי:
ח. נפוגותי ונדכיתי עד מאד שאגתי מנהמת לבי:
ט. אדני נגדך כל תאותי ואנחתי ממך לא נסתרה:
י. לבי סחרחר עזבני כחי ואור עיני גם הם אין אתי:
יא. אהבי ורעי מנגד נגעי יעמדו וקרובי מרחק עמדו:
יב. וינקשו מבקשי נפשי ודרשי רעתי דברו הוות ומרמות כל היום יהגו:
יג. ואני כחרש לא אשמע וכאלם לא יפתח פיו:
יד. ואהי כאיש אשר לא שמע ואין בפיו תוכחות:
טו. כי לך יהוה הוחלתי אתה תענה אדני אלהי:
טז. כי אמרתי פן ישמחו לי במוט רגלי עלי הגדילו:
יז. כי אני לצלע נכון ומכאובי נגדי תמיד:
יח. כי עוני אגיד אדאג מחטאתי:
יט. ואיבי חיים עצמו ורבו שנאי שקר:
כ. ומשלמי רעה תחת טובה ישטנוני תחת רדופי טוב:
כא. אל תעזבני יהוה אלהי אל תרחק ממני:
כב. חושה לעזרתי אדני תשועתי:
| 
