א. למנצח לדוד מזמור קוה קויתי יהוה ויט אלי וישמע שועתי:
ב. ויעלני מבור שאון מטיט היון ויקם על סלע רגלי כונן אשרי:
ג. ויתן בפי שיר חדש תהלה לאלהינו יראו רבים וייראו ויבטחו ביהוה:
ד. אשרי הגבר אשר שם יהוה מבטחו ולא פנה אל רהבים ושטי כזב:
ה. רבות עשית אתה יהוה אלהי נפלאתיך ומחשבתיך אלינו אין ערך אליך אגידה ואדברה עצמו מספר:
ו. זבח ומנחה לא חפצת אזנים כרית לי עולה וחטאה לא שאלת:
ז. אז אמרתי הנה באתי במגלת ספר כתוב עלי:
ח. לעשות רצונך אלהי חפצתי ותורתך בתוך מעי:
ט. בשרתי צדק בקהל רב הנה שפתי לא אכלא יהוה אתה ידעת:
י. צדקתך לא כסיתי בתוך לבי אמונתך ותשועתך אמרתי לא כחדתי חסדך ואמתך לקהל רב:
יא. אתה יהוה לא תכלא רחמיך ממני חסדך ואמתך תמיד יצרוני:
יב. כי אפפו עלי רעות עד אין מספר השיגוני עונתי ולא יכלתי לראות עצמו משערות ראשי ולבי עזבני:
יג. רצה יהוה להצילני יהוה לעזרתי חושה:
יד. יבשו ויחפרו יחד מבקשי נפשי לספותה יסגו אחור ויכלמו חפצי רעתי:
טו. ישמו על עקב בשתם האמרים לי האח האח:
טז. ישישו וישמחו בך כל מבקשיך יאמרו תמיד יגדל יהוה אהבי תשועתך:
יז. ואני עני ואביון אדני יחשב לי עזרתי ומפלטי אתה אלהי אל תאחר:
| 
