א. למנצח משכיל לבני קרח כאיל תערג על אפיקי מים כן נפשי תערג אליך אלהים:
ב. צמאה נפשי לאלהים לאל חי מתי אבוא ואראה פני אלהים:
ג. היתה לי דמעתי לחם יומם ולילה באמר אלי כל היום איה אלהיך:
ד. אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג:
ה. מה תשתוחחי נפשי ותהמי עלי הוחילי לאלהים כי עוד אודנו ישועות פניו:
ו. אלהי עלי נפשי תשתוחח על כן אזכרך מארץ ירדן וחרמונים מהר מצער:
ז. תהום אל תהום קורא לקול צנוריך כל משבריך וגליך עלי עברו:
ח. יומם יצוה יהוה חסדו ובלילה שירה עמי תפלה לאל חיי:
ט. אומרה לאל סלעי למה שכחתני למה קדר אלך בלחץ אויב:
י. ברצח בעצמותי חרפוני צוררי באמרם אלי כל היום איה אלהיך:
יא. מה תשתוחחי נפשי ומה תהמי עלי הוחילי לאלהים כי עוד אודנו ישועת פני ואלהי:
| 
