א. למנצח לבני קרח על עלמות שיר אלהים לנו מחסה ועז עזרה בצרות נמצא מאד:
ב. על כן לא נירא בהמיר ארץ ובמוט הרים בלב ימים:
ג. יהמו יחמרו מימיו ירעשו הרים בגאותו סלה:
ד. נהר פלגיו ישמחו עיר אלהים קדש משכני עליון:
ה. אלהים בקרבה בל תמוט יעזרה אלהים לפנות בקר:
ו. המו גוים מטו ממלכות נתן בקולו תמוג ארץ:
ז. יהוה צבאות עמנו משגב לנו אלהי יעקב סלה:
ח. לכו חזו מפעלות יהוה אשר שם שמות בארץ:
ט. משבית מלחמות עד קצה הארץ קשת ישבר וקצץ חנית עגלות ישרף באש:
י. הרפו ודעו כי אנכי אלהים ארום בגוים ארום בארץ:
יא. יהוה צבאות עמנו משגב לנו אלהי יעקב סלה:
| 
