א. למנצח מזמור לדוד בבוא אליו נתן הנביא כאשר בא אל בת שבע חנני אלהים כחסדך כרב רחמיך מחה פשעי:
ב. הרבה כבסני מעוני ומחטאתי טהרני:
ג. כי פשעי אני אדע וחטאתי נגדי תמיד:
ד. לך לבדך חטאתי והרע בעיניך עשיתי למען תצדק בדברך תזכה בשפטך:
ה. הן בעוון חוללתי ובחטא יחמתני אמי:
ו. הן אמת חפצת בטחות ובסתם חכמה תודיעני:
ז. תחטאני באזוב ואטהר תכבסני ומשלג אלבין:
ח. תשמיעני ששון ושמחה תגלנה עצמות דכית:
ט. הסתר פניך מחטאי וכל עונתי מחה:
י. לב טהור ברא לי אלהים ורוח נכון חדש בקרבי:
יא. אל תשליכני מלפניך ורוח קדשך אל תקח ממני:
יב. השיבה לי ששון ישעך ורוח נדיבה תסמכני:
יג. אלמדה פשעים דרכיך וחטאים אליך ישובו:
יד. הצילני מדמים אלהים אלהי תשועתי תרנן לשוני צדקתך:
טו. אדני שפתי תפתח ופי יגיד תהלתך:
טז. כי לא תחפץ זבח ואתנה עולה לא תרצה:
יז. זבחי אלהים רוח נשברה לב נשבר ונדכה אלהים לא תבזה:
יח. היטיבה ברצונך את ציון תבנה חומות ירושלם:
יט. אז תחפץ זבחי צדק עולה וכליל אז יעלו על מזבחך פרים:
| 
