א. למנצח אל תשחת לדוד מכתם בשלח שאול וישמרו את הבית להמיתו הצילני מאיבי אלהי ממתקוממי תשגבני:
ב. הצילני מפעלי און ומאנשי דמים הושיעני:
ג. כי הנה ארבו לנפשי יגורו עלי עזים לא פשעי ולא חטאתי יהוה:
ד. בלי עון ירוצון ויכוננו עורה לקראתי וראה:
ה. ואתה יהוה אלהים צבאות אלהי ישראל הקיצה לפקד כל הגוים אל תחן כל בגדי און סלה:
ו. ישובו לערב יהמו ככלב ויסובבו עיר:
ז. הנה יביעון בפיהם חרבות בשפתותיהם כי מי שמע:
ח. ואתה יהוה תשחק למו תלעג לכל גוים:
ט. עזו אליך אשמרה כי אלהים משגבי:
י. אלהי חסדו יקדמני אלהים יראני בשררי:
יא. אל תהרגם פן ישכחו עמי הניעמו בחילך והורידמו מגננו אדני:
יב. חטאת פימו דבר שפתימו וילכדו בגאונם ומאלה ומכחש יספרו:
יג. כלה בחמה כלה ואינמו וידעו כי אלהים משל ביעקב לאפסי הארץ סלה:
יד. וישובו לערב יהמו ככלב ויסובבו עיר:
טו. המה ינועון לאכל אם לא ישבעו וילינו:
טז. ואני אשיר עזך וארנן לבקר חסדך כי היית משגב לי ומנוס ביום צר לי:
יז. עזי אליך אזמרה כי אלהים משגבי אלהי חסדי:
| 
