א. למנצח על הגתית לבני קרח מזמור מה ידידות משכנותיך יהוה צבאות:
ב. נכספה וגם כלתה נפשי לחצרות יהוה לבי ובשרי ירננו אל אל חי:
ג. גם צפור מצאה בית ודרור קן לה אשר שתה אפרחיה את מזבחותיך יהוה צבאות מלכי ואלהי:
ד. אשרי יושבי ביתך עוד יהללוך סלה:
ה. אשרי אדם עוז לו בך מסלות בלבבם:
ו. עברי בעמק הבכא מעין ישיתוהו גם ברכות יעטה מורה:
ז. ילכו מחיל אל חיל יראה אל אלהים בציון:
ח. יהוה אלהים צבאות שמעה תפלתי האזינה אלהי יעקב סלה:
ט. מגננו ראה אלהים והבט פני משיחך:
י. כי טוב יום בחצריך מאלף בחרתי הסתופף בבית אלהי מדור באהלי רשע:
יא. כי שמש ומגן יהוה אלהים חן וכבוד יתן יהוה לא ימנע טוב להלכים בתמים:
יב. יהוה צבאות אשרי אדם בטח בך:
| 
