א. משכיל לאיתן האזרחי חסדי יהוה עולם אשירה לדר ודר אודיע אמונתך בפי:
ב. כי אמרתי עולם חסד יבנה שמים תכן אמונתך בהם:
ג. כרתי ברית לבחירי נשבעתי לדוד עבדי:
ד. עד עולם אכין זרעך ובניתי לדר ודור כסאך סלה:
ה. ויודו שמים פלאך יהוה אף אמונתך בקהל קדשים:
ו. כי מי בשחק יערך ליהוה ידמה ליהוה בבני אלים:
ז. אל נערץ בסוד קדשים רבה ונורא על כל סביביו:
ח. יהוה אלהי צבאות מי כמוך חסין יה ואמונתך סביבותיך:
ט. אתה מושל בגאות הים בשוא גליו אתה תשבחם:
י. אתה דכאת כחלל רהב בזרוע עזך פזרת אויביך:
יא. לך שמים אף לך ארץ תבל ומלאה אתה יסדתם:
יב. צפון וימין אתה בראתם תבור וחרמון בשמך ירננו:
יג. לך זרוע עם גבורה תעז ידך תרום ימינך:
יד. צדק ומשפט מכון כסאך חסד ואמת יקדמו פניך:
טו. אשרי העם יודעי תרועה יהוה באור פניך יהלכון:
טז. בשמך יגילון כל היום ובצדקתך ירומו:
יז. כי תפארת עזמו אתה וברצנך תרים קרננו:
יח. כי ליהוה מגננו ולקדוש ישראל מלכנו:
יט. אז דברת בחזון לחסידיך ותאמר שויתי עזר על גבור הרימותי בחור מעם:
כ. מצאתי דוד עבדי בשמן קדשי משחתיו:
כא. אשר ידי תכון עמו אף זרועי תאמצנו:
כב. לא ישא אויב בו ובן עולה לא יעננו:
כג. וכתותי מפניו צריו ומשנאיו אגוף:
כד. ואמונתי וחסדי עמו ובשמי תרום קרנו:
כה. ושמתי בים ידו ובנהרות ימינו:
כו. הוא יקראני אבי אתה אלי וצור ישועתי:
כז. אף אני בכור אתנהו עליון למלכי ארץ:
כח. לעולם אשמור לו חסדי ובריתי נאמנת לו:
כט. ושמתי לעד זרעו וכסאו כימי שמים:
ל. אם יעזבו בניו תורתי ובמשפטי לא ילכון:
לא. אם חקתי יחללו ומצותי לא ישמרו:
לב. ופקדתי בשבט פשעם ובנגעים עונם:
לג. וחסדי לא אפיר מעמו ולא אשקר באמונתי:
לד. לא אחלל בריתי ומוצא שפתי לא אשנה:
לה. אחת נשבעתי בקדשי אם לדוד אכזב:
לו. זרעו לעולם יהיה וכסאו כשמש נגדי:
לז. כירח יכון עולם ועד בשחק נאמן סלה:
לח. ואתה זנחת ותמאס התעברת עם משיחך:
לט. נארתה ברית עבדך חללת לארץ נזרו:
מ. פרצת כל גדרתיו שמת מבצריו מחתה:
מא. שסהו כל עברי דרך היה חרפה לשכניו:
מב. הרימות ימין צריו השמחת כל אויביו:
מג. אף תשיב צור חרבו ולא הקימתו במלחמה:
מד. השבת מטהרו וכסאו לארץ מגרתה:
מה. הקצרת ימי עלומיו העטית עליו בושה סלה:
מו. עד מה יהוה תסתר לנצח תבער כמו אש חמתך:
מז. זכר אני מה חלד על מה שוא בראת כל בני אדם:
מח. מי גבר יחיה ולא יראה מות ימלט נפשו מיד שאול סלה:
מט. איה חסדיך הראשנים אדני נשבעת לדוד באמונתך:
נ. זכר אדני חרפת עבדיך שאתי בחיקי כל רבים עמים:
נא. אשר חרפו אויביך יהוה אשר חרפו עקבות משיחך:
נב. ברוך יהוה לעולם אמן ואמן:
| 
