א. יהוה מלך ירגזו עמים ישב כרובים תנוט הארץ:
ב. יהוה בציון גדול ורם הוא על כל העמים:
ג. יודו שמך גדול ונורא קדוש הוא:
ד. ועז מלך משפט אהב אתה כוננת מישרים משפט וצדקה ביעקב אתה עשית:
ה. רוממו יהוה אלהינו והשתחוו להדם רגליו קדוש הוא:
ו. משה ואהרן בכהניו ושמואל בקראי שמו קראים אל יהוה והוא יענם:
ז. בעמוד ענן ידבר אליהם שמרו עדתיו וחק נתן למו:
ח. יהוה אלהינו אתה עניתם אל נשא היית להם ונקם על עלילותם:
ט. רוממו יהוה אלהינו והשתחוו להר קדשו כי קדוש יהוה אלהינו:
| 
