א. לדוד מזמור ליהוה הארץ ומלואה תבל וישבי בה׃
ב. כי־הוא על־ימים יסדה ועל־נהרות יכוננה׃
ג. מי־יעלה בהר־יהוה ומי־יקום במקום קדשו׃
ד. נקי כפים ובר־לבב אשר ׀ לא־נשא לשוא נפשי ולא נשבע למרמה׃
ה. ישא ברכה מאת יהוה וצדקה מאלהי ישעו׃
ו. זה דור [דרשו כ] (דרשיו ק) מבקשי פניך יעקב סלה׃
ז. שאו שערים ׀ ראשיכם והנשאו פתחי עולם ויבוא מלך הכבוד׃
ח. מי זה מלך הכבוד יהוה עזוז וגבור יהוה גבור מלחמה׃
ט. שאו שערים ׀ ראשיכם ושאו פתחי עולם ויבא מלך הכבוד׃
י. מי הוא זה מלך הכבוד יהוה צבאות הוא מלך הכבוד סלה׃
| 
