א. א ויהי המלך שלמה מלך על כל ישראל {ס}
ב. ב ואלה השרים אשר לו עזריהו בן צדוק הכהן {ס}
ג. ג אליחרף ואחיה בני שישא ספרים {ס} יהושפט בן אחילוד המזכיר {ס}
ד. ד ובניהו בן יהוידע על הצבא {ס} וצדוק ואביתר כהנים {ס}
ה. ה ועזריהו בן נתן על הנצבים {ס} וזבוד בן נתן כהן רעה המלך {ס}
ו. ו ואחישר על הבית {ס} ואדנירם בן עבדא על המס {ס}
ז. ז ולשלמה שנים עשר נצבים על כל ישראל וכלכלו את המלך ואת ביתו חדש בשנה יהיה על אחד (האחד) לכלכל {ס}
ח. ח ואלה שמותם בן חור בהר אפרים {ס}
ט. ט בן דקר במקץ ובשעלבים ובית שמש ואילון בית חנן {ס}
י. י בן חסד בארבות לו שכה וכל ארץ חפר {ס}
יא. יא בן אבינדב כל נפת דאר טפת בת שלמה היתה לו לאשה {ס}
יב. יב בענא בן אחילוד תענך ומגדו וכל בית שאן אשר אצל צרתנה מתחת ליזרעאל מבית שאן עד אבל מחולה עד מעבר ליקמעם {ס}
יג. יג בן גבר ברמת גלעד לו חות יאיר בן מנשה אשר בגלעד לו חבל ארגב אשר בבשן--ששים ערים גדלות חומה ובריח נחשת {ס}
יד. יד אחינדב בן עדא מחנימה {ס}
טו. טו אחימעץ בנפתלי גם הוא לקח את בשמת בת שלמה--לאשה {ס}
טז. טז בענא בן חושי באשר ובעלות {ס}
יז. יז יהושפט בן פרוח ביששכר {ס}
יח. יח שמעי בן אלא בבנימן {ס}
יט. יט גבר בן ארי בארץ גלעד--ארץ סיחון מלך האמרי ועג מלך הבשן ונציב אחד אשר בארץ
כ. כ יהודה וישראל רבים כחול אשר על הים לרב אכלים ושתים ושמחים
| 
