דניאל, Chapter 12 יב

א. א ובעת ההיא יעמד מיכאל השר הגדול העמד על בני עמך והיתה עת צרה אשר לא נהיתה מהיות גוי עד העת ההיא ובעת ההיא ימלט עמך כל הנמצא כתוב בספר    ב. ב ורבים מישני אדמת עפר יקיצו אלה לחיי עולם ואלה לחרפות לדראון עולם  {ס}    ג. ג והמשכלים--יזהרו כזהר הרקיע ומצדיקי הרבים ככוכבים לעולם ועד  {פ}    ד. ד ואתה דניאל סתם הדברים וחתם הספר--עד עת קץ ישטטו רבים ותרבה הדעת    ה. ה וראיתי אני דניאל והנה שנים אחרים עמדים  אחד הנה לשפת היאר ואחד הנה לשפת היאר    ו. ו ויאמר לאיש לבוש הבדים אשר ממעל למימי היאר  עד מתי קץ הפלאות    ז. ז ואשמע את האיש לבוש הבדים אשר ממעל למימי היאר וירם ימינו ושמאלו אל השמים וישבע בחי העולם  כי למועד מועדים וחצי וככלות נפץ יד עם קדש--תכלינה כל אלה    ח. ח ואני שמעתי ולא אבין ואמרה--אדני מה אחרית אלה  {פ}    ט. ט ויאמר לך דניאל  כי סתמים וחתמים הדברים עד עת קץ    י. י יתבררו ויתלבנו ויצרפו רבים והרשיעו רשעים ולא יבינו כל רשעים והמשכלים יבינו    יא. יא ומעת הוסר התמיד ולתת שקוץ שמם--ימים אלף מאתים ותשעים    יב. יב אשרי המחכה ויגיע  לימים--אלף שלש מאות שלשים וחמשה    יג. יג ואתה לך לקץ ותנוח ותעמד לגרלך לקץ הימין  {ש}