דברים, Chapter 34 לד

א. א ויעל משה מערבת מואב אל הר נבו ראש הפסגה אשר על פני ירחו ויראהו יהוה את כל הארץ את הגלעד עד דן    ב. ב ואת כל נפתלי ואת ארץ אפרים ומנשה ואת כל ארץ יהודה עד הים האחרון    ג. ג ואת הנגב ואת הככר בקעת ירחו עיר התמרים--עד צער    ד. ד ויאמר יהוה אליו זאת הארץ אשר נשבעתי לאברהם ליצחק וליעקב לאמר לזרעך אתננה הראיתיך בעיניך ושמה לא תעבר    ה. ה וימת שם משה עבד יהוה בארץ מואב--על פי יהוה    ו. ו ויקבר אתו בגי בארץ מואב מול בית פעור ולא ידע איש את קברתו עד היום הזה    ז. ז ומשה בן מאה ועשרים שנה--במתו לא כהתה עינו ולא נס לחה    ח. ח ויבכו בני ישראל את משה בערבת מואב שלשים יום ויתמו ימי בכי אבל משה    ט. ט ויהושע בן נון מלא רוח חכמה--כי סמך משה את ידיו עליו וישמעו אליו בני ישראל ויעשו כאשר צוה יהוה את משה    י. י ולא קם נביא עוד בישראל כמשה אשר ידעו יהוה פנים אל פנים    יא. יא לכל האתת והמופתים אשר שלחו יהוה לעשות בארץ מצרים--לפרעה ולכל עבדיו ולכל ארצו    יב. יב ולכל היד החזקה ולכל המורא הגדול אשר עשה משה לעיני כל ישראל  {ש}