א. א ואלה המשפטים אשר תשים לפניהם
ב. ב כי תקנה עבד עברי שש שנים יעבד ובשבעת--יצא לחפשי חנם
ג. ג אם בגפו יבא בגפו יצא אם בעל אשה הוא ויצאה אשתו עמו
ד. ד אם אדניו יתן לו אשה וילדה לו בנים או בנות--האשה וילדיה תהיה לאדניה והוא יצא בגפו
ה. ה ואם אמר יאמר העבד אהבתי את אדני את אשתי ואת בני לא אצא חפשי
ו. ו והגישו אדניו אל האלהים והגישו אל הדלת או אל המזוזה ורצע אדניו את אזנו במרצע ועבדו לעלם {ס}
ז. ז וכי ימכר איש את בתו לאמה--לא תצא כצאת העבדים
ח. ח אם רעה בעיני אדניה אשר לא (לו) יעדה--והפדה לעם נכרי לא ימשל למכרה בבגדו בה
ט. ט ואם לבנו ייעדנה--כמשפט הבנות יעשה לה
י. י אם אחרת יקח לו--שארה כסותה וענתה לא יגרע
יא. יא ואם שלש אלה--לא יעשה לה ויצאה חנם אין כסף {ס}
יב. יב מכה איש ומת מות יומת
יג. יג ואשר לא צדה והאלהים אנה לידו--ושמתי לך מקום אשר ינוס שמה {ס}
יד. יד וכי יזד איש על רעהו להרגו בערמה--מעם מזבחי תקחנו למות {ס}
טו. טו ומכה אביו ואמו מות יומת {ס}
טז. טז וגנב איש ומכרו ונמצא בידו מות יומת {ס}
יז. יז ומקלל אביו ואמו מות יומת {ס}
יח. יח וכי יריבן אנשים--והכה איש את רעהו באבן או באגרף ולא ימות ונפל למשכב
יט. יט אם יקום והתהלך בחוץ על משענתו--ונקה המכה רק שבתו יתן ורפא ירפא {ס}
כ. כ וכי יכה איש את עבדו או את אמתו בשבט ומת תחת ידו--נקם ינקם
כא. כא אך אם יום או יומים יעמד--לא יקם כי כספו הוא {ס}
כב. כב וכי ינצו אנשים ונגפו אשה הרה ויצאו ילדיה ולא יהיה אסון--ענוש יענש כאשר ישית עליו בעל האשה ונתן בפללים
כג. כג ואם אסון יהיה--ונתתה נפש תחת נפש
כד. כד עין תחת עין שן תחת שן יד תחת יד רגל תחת רגל
כה. כה כויה תחת כויה פצע תחת פצע חבורה תחת חבורה {ס}
כו. כו וכי יכה איש את עין עבדו או את עין אמתו--ושחתה לחפשי ישלחנו תחת עינו
כז. כז ואם שן עבדו או שן אמתו יפיל--לחפשי ישלחנו תחת שנו {פ}
כח. כח וכי יגח שור את איש או את אשה ומת--סקול יסקל השור ולא יאכל את בשרו ובעל השור נקי
כט. כט ואם שור נגח הוא מתמל שלשם והועד בבעליו ולא ישמרנו והמית איש או אשה--השור יסקל וגם בעליו יומת
ל. ל אם כפר יושת עליו--ונתן פדין נפשו ככל אשר יושת עליו
לא. לא או בן יגח או בת יגח--כמשפט הזה יעשה לו
לב. לב אם עבד יגח השור או אמה--כסף שלשים שקלים יתן לאדניו והשור יסקל {ס}
לג. לג וכי יפתח איש בור או כי יכרה איש בר--ולא יכסנו ונפל שמה שור או חמור
לד. לד בעל הבור ישלם כסף ישיב לבעליו והמת יהיה לו {ס}
לה. לה וכי יגף שור איש את שור רעהו ומת--ומכרו את השור החי וחצו את כספו וגם את המת יחצון
לו. לו או נודע כי שור נגח הוא מתמול שלשם ולא ישמרנו בעליו--שלם ישלם שור תחת השור והמת יהיה לו {ס} [ (Exodus 21:37) לז כי יגנב איש שור או שה וטבחו או מכרו--חמשה בקר ישלם תחת השור וארבע צאן תחת השה ]
| 
