א. א כי נער ישראל ואהבהו וממצרים קראתי לבני
ב. ב קראו להם כן הלכו מפניהם--לבעלים יזבחו ולפסלים יקטרון
ג. ג ואנכי תרגלתי לאפרים קחם על זרועתיו ולא ידעו כי רפאתים
ד. ד בחבלי אדם אמשכם בעבתות אהבה ואהיה להם כמרימי על על לחיהם ואט אליו אוכיל
ה. ה לא ישוב אל ארץ מצרים ואשור הוא מלכו כי מאנו לשוב
ו. ו וחלה חרב בעריו וכלתה בדיו ואכלה--ממעצותיהם
ז. ז ועמי תלואים למשובתי ואל על יקראהו--יחד לא ירומם
ח. ח איך אתנך אפרים אמגנך ישראל--איך אתנך כאדמה אשימך כצבאים נהפך עלי לבי יחד נכמרו נחומי
ט. ט לא אעשה חרון אפי לא אשוב לשחת אפרים כי אל אנכי ולא איש--בקרבך קדוש ולא אבוא בעיר
י. י אחרי יהוה ילכו כאריה ישאג כי הוא ישאג ויחרדו בנים מים
יא. יא יחרדו כצפור ממצרים וכיונה מארץ אשור והושבתים על בתיהם נאם יהוה {ס}
| 
