ב. ב עד-אנה תוגיון נפשי ותדכאונני במלים
ג. ג זה עשר פעמים תכלימוני לא-תבשו תהכרו-לי
ד. ד ואף-אמנם שגיתי אתי תלין משוגתי
ה. ה אם-אמנם עלי תגדילו ותוכיחו עלי חרפתי
ו. ו דעו-אפו כי-אלוה עותני ומצודו עלי הקיף
ז. ז הן אצעק חמס ולא אענה אשוע ואין משפט
ח. ח ארחי גדר ולא אעבור ועל נתיבותי חשך ישים
ט. ט כבודי מעלי הפשיט ויסר עטרת ראשי
י. י יתצני סביב ואלך ויסע כעץ תקותי
יא. יא ויחר עלי אפו ויחשבני לו כצריו
יב. יב יחד יבאו גדודיו--ויסלו עלי דרכם ויחנו סביב לאהלי
יג. יג אחי מעלי הרחיק וידעי אך-זרו ממני
יד. יד חדלו קרובי ומידעי שכחוני
טו. טו גרי ביתי ואמהתי לזר תחשבני נכרי הייתי בעיניהם
טז. טז לעבדי קראתי ולא יענה במו-פי אתחנן-לו
יז. יז רוחי זרה לאשתי וחנתי לבני בטני
יח. יח גם-עוילים מאסו בי אקומה וידברו-בי
יט. יט תעבוני כל-מתי סודי וזה-אהבתי נהפכו-בי
כ. כ בעורי ובבשרי דבקה עצמי ואתמלטה בעור שני
כא. כא חנני חנני אתם רעי כי יד-אלוה נגעה בי
כב. כב למה תרדפני כמו-אל ומבשרי לא תשבעו
כג. כג מי-יתן אפו ויכתבון מלי מי-יתן בספר ויחקו
כד. כד בעט-ברזל ועפרת-- לעד בצור יחצבון
כה. כה ואני ידעתי גאלי חי ואחרון על-עפר יקום
כו. כו ואחר עורי נקפו-זאת ומבשרי אחזה אלוה
כז. כז אשר אני אחזה-לי--ועיני ראו ולא-זר כלו כליתי בחקי
כח. כח כי תאמרו מה-נרדף-לו ושרש דבר נמצא-בי
כט. כט גורו לכם מפני-חרב--כי-חמה עונות חרב למען תדעון שדין (שדון)
| 
