א. א מדוע--משדי לא-נצפנו עתים וידעו לא-חזו ימיו
ב. ב גבלות ישיגו עדר גזלו וירעו
ג. ג חמור יתומים ינהגו יחבלו שור אלמנה
ד. ד יטו אבינים מדרך יחד חבאו עניי-ארץ
ה. ה הן פראים במדבר-- יצאו בפעלם משחרי לטרף ערבה לו לחם לנערים
ו. ו בשדה בלילו יקצירו (יקצורו) וכרם רשע ילקשו
ז. ז ערום ילינו מבלי לבוש ואין כסות בקרה
ח. ח מזרם הרים ירטבו ומבלי מחסה חבקו-צור
ט. ט יגזלו משד יתום ועל-עני יחבלו
י. י ערום הלכו בלי לבוש ורעבים נשאו עמר
יא. יא בין-שורתם יצהירו יקבים דרכו ויצמאו
יב. יב מעיר מתים ינאקו-- ונפש-חללים תשוע ואלוה לא-ישים תפלה
יג. יג המה היו--במרדי-אור לא-הכירו דרכיו ולא ישבו בנתיבתיו
יד. יד לאור יקום רוצח--יקטל-עני ואביון ובלילה יהי כגנב
טו. טו ועין נאף שמרה נשף לאמר-- לא-תשורני עין וסתר פנים ישים
טז. טז חתר בחשך בתים יומם חתמו-למו לא-ידעו אור
יז. יז כי יחדו בקר למו צלמות כי-יכיר בלהות צלמות
יח. יח קל-הוא על-פני-מים-- תקלל חלקתם בארץ לא-יפנה דרך כרמים
יט. יט ציה גם-חם יגזלו מימי-שלג שאול חטאו
כ. כ ישכחהו רחם מתקו רמה-- עוד לא-יזכר ותשבר כעץ עולה
כא. כא רעה עקרה לא תלד ואלמנה לא ייטיב
כב. כב ומשך אבירים בכחו יקום ולא-יאמין בחיין
כג. כג יתן-לו לבטח וישען ועיניהו על-דרכיהם
כד. כד רומו מעט ואיננו והמכו ככל יקפצון וכראש שבלת ימלו
כה. כה ואם-לא אפו מי יכזיבני וישם לאל מלתי
| 
