א. א ואולם--שמע-נא איוב מלי וכל-דברי האזינה
ב. ב הנה-נא פתחתי פי דברה לשוני בחכי
ג. ג ישר-לבי אמרי ודעת שפתי ברור מללו
ד. ד רוח-אל עשתני ונשמת שדי תחיני
ה. ה אם-תוכל השיבני ערכה לפני התיצבה
ו. ו הן-אני כפיך לאל מחמר קרצתי גם-אני
ז. ז הנה אמתי לא תבעתך ואכפי עליך לא-יכבד
ח. ח אך אמרת באזני וקול מלין אשמע
ט. ט זך אני בלי-פשע חף אנכי ולא עון לי
י. י הן תנואות עלי ימצא יחשבני לאויב לו
יא. יא ישם בסד רגלי ישמר כל-ארחתי
יב. יב הן-זאת לא-צדקת אענך כי-ירבה אלוה מאנוש
יג. יג מדוע אליו ריבות כי כל-דבריו לא יענה
יד. יד כי-באחת ידבר-אל ובשתים לא ישורנה
טו. טו בחלום חזיון לילה--בנפל תרדמה על-אנשים בתנומות עלי משכב
טז. טז אז יגלה אזן אנשים ובמסרם יחתם
יז. יז להסיר אדם מעשה וגוה מגבר יכסה
יח. יח יחשך נפשו מני-שחת וחיתו מעבר בשלח
יט. יט והוכח במכאוב על-משכבו וריב (ורוב) עצמיו אתן
כ. כ וזהמתו חיתו לחם ונפשו מאכל תאוה
כא. כא יכל בשרו מראי ושפי (ושפו) עצמתיו לא ראו
כב. כב ותקרב לשחת נפשו וחיתו לממתים
כג. כג אם-יש עליו מלאך--מליץ אחד מני-אלף להגיד לאדם ישרו
כד. כד ויחננו--ויאמר פדעהו מרדת שחת מצאתי כפר
כה. כה רטפש בשרו מנער ישוב לימי עלומיו
כו. כו יעתר אל-אלוה וירצהו וירא פניו בתרועה וישב לאנוש צדקתו
כז. כז ישר על-אנשים ויאמר חטאתי וישר העויתי ולא-שוה לי
כח. כח פדה נפשי (נפשו) מעבר בשחת וחיתי (וחיתו) באור תראה
כט. כט הן-כל-אלה יפעל-אל-- פעמים שלוש עם-גבר
ל. ל להשיב נפשו מני-שחת-- לאור באור החיים
לא. לא הקשב איוב שמע-לי החרש ואנכי אדבר
לב. לב אם-יש-מלין השיבני דבר כי-חפצתי צדקך
לג. לג אם-אין אתה שמע-לי החרש ואאלפך חכמה
| 
