ב. ב שמעו חכמים מלי וידעים האזינו לי
ג. ג כי-אזן מלין תבחן וחך יטעם לאכל
ד. ד משפט נבחרה-לנו נדעה בינינו מה-טוב
ה. ה כי-אמר איוב צדקתי ואל הסיר משפטי
ו. ו על-משפטי אכזב אנוש חצי בלי-פשע
ז. ז מי-גבר כאיוב ישתה-לעג כמים
ח. ח וארח לחברה עם-פעלי און וללכת עם-אנשי-רשע
ט. ט כי-אמר לא יסכן-גבר-- ברצתו עם-אלהים
י. י לכן אנשי לבב-- שמעו-לי חללה לאל מרשע ושדי מעול
יא. יא כי פעל אדם ישלם-לו וכארח איש ימצאנו
יב. יב אף-אמנם אל לא-ירשיע ושדי לא-יעות משפט
יג. יג מי-פקד עליו ארצה ומי שם תבל כלה
יד. יד אם-ישים אליו לבו רוחו ונשמתו אליו יאסף
טו. טו יגוע כל-בשר יחד ואדם על-עפר ישוב
טז. טז ואם-בינה שמעה-זאת האזינה לקול מלי
יז. יז האף שונא משפט יחבוש ואם-צדיק כביר תרשיע
יח. יח האמר למלך בליעל-- רשע אל-נדיבים
יט. יט אשר לא-נשא פני שרים ולא נכר-שוע לפני-דל כי-מעשה ידיו כלם
כ. כ רגע ימתו-- וחצות לילה יגעשו עם ויעברו ויסירו אביר לא ביד
כא. כא כי-עיניו על-דרכי-איש וכל-צעדיו יראה
כב. כב אין-חשך ואין צלמות-- להסתר שם פעלי און
כג. כג כי לא על-איש ישים עוד-- להלך אל-אל במשפט
כד. כד ירע כבירים לא-חקר ויעמד אחרים תחתם
כה. כה לכן--יכיר מעבדיהם והפך לילה וידכאו
כו. כו תחת-רשעים ספקם-- במקום ראים
כז. כז אשר על-כן סרו מאחריו וכל-דרכיו לא השכילו
כח. כח להביא עליו צעקת-דל וצעקת עניים ישמע
כט. כט והוא ישקט ומי ירשע-- ויסתר פנים ומי ישורנו ועל-גוי ועל-אדם יחד
ל. ל ממלך אדם חנף-- ממקשי עם
לא. לא כי-אל-אל האמר נשאתי-- לא אחבל
לב. לב בלעדי אחזה אתה הרני אם-עול פעלתי לא אסיף
לג. לג המעמך ישלמנה כי-מאסת--כי-אתה תבחר ולא-אני ומה-ידעת דבר
לד. לד אנשי לבב יאמרו לי וגבר חכם שמע לי
לה. לה איוב לא-בדעת ידבר ודבריו לא בהשכיל
לו. לו אבי--יבחן איוב עד-נצח על-תשבת באנשי-און
לז. לז כי יסיף על-חטאתו פשע בינינו יספוק וירב אמריו לאל
| 
