א. א הידעת--עת לדת יעלי-סלע חלל אילות תשמר
ב. ב תספר ירחים תמלאנה וידעת עת לדתנה
ג. ג תכרענה ילדיהן תפלחנה חבליהם תשלחנה
ד. ד יחלמו בניהם ירבו בבר יצאו ולא-שבו למו
ה. ה מי-שלח פרא חפשי ומסרות ערוד מי פתח
ו. ו אשר-שמתי ערבה ביתו ומשכנותיו מלחה
ז. ז ישחק להמון קריה תשאות נגש לא ישמע
ח. ח יתור הרים מרעהו ואחר כל-ירוק ידרוש
ט. ט היאבה רים עבדך אם-ילין על-אבוסך
י. י התקשר-רים בתלם עבתו אם-ישדד עמקים אחריך
יא. יא התבטח-בו כי-רב כחו ותעזב אליו יגיעך
יב. יב התאמין בו כי-ישוב (ישיב) זרעך וגרנך יאסף
יג. יג כנף-רננים נעלסה אם-אברה חסידה ונצה
יד. יד כי-תעזב לארץ בציה ועל-עפר תחמם
טו. טו ותשכח כי-רגל תזורה וחית השדה תדושה
טז. טז הקשיח בניה ללא-לה לריק יגיעה בלי-פחד
יז. יז כי-השה אלוה חכמה ולא-חלק לה בבינה
יח. יח כעת במרום תמריא תשחק לסוס ולרכבו
יט. יט התתן לסוס גבורה התלביש צוארו רעמה
כ. כ התרעישנו כארבה הוד נחרו אימה
כא. כא יחפרו בעמק וישיש בכח יצא לקראת-נשק
כב. כב ישחק לפחד ולא יחת ולא-ישוב מפני-חרב
כג. כג עליו תרנה אשפה להב חנית וכידון
כד. כד ברעש ורגז יגמא-ארץ ולא-יאמין כי-קול שופר
כה. כה בדי שפר יאמר האח-- ומרחוק יריח מלחמה רעם שרים ותרועה
כו. כו המבינתך יאבר-נץ יפרש כנפו לתימן
כז. כז אם-על-פיך יגביה נשר וכי ירים קנו
כח. כח סלע ישכן ויתלנן-- על שן-סלע ומצודה
כט. כט משם חפר-אכל למרחוק עיניו יביטו
ל. ל ואפרחו יעלעו-דם ובאשר חללים שם הוא
| 
