א. א ויען בלדד השוחי ויאמר
ב. ב עד-אן תמלל-אלה ורוח כביר אמרי-פיך
ג. ג האל יעות משפט ואם-שדי יעות-צדק
ד. ד אם-בניך חטאו-לו וישלחם ביד-פשעם
ה. ה אם-אתה תשחר אל-אל ואל-שדי תתחנן
ו. ו אם-זך וישר אתה כי-עתה יעיר עליך ושלם נות צדקך
ז. ז והיה ראשיתך מצער ואחריתך ישגה מאד
ח. ח כי-שאל-נא לדר רישון וכונן לחקר אבותם
ט. ט כי-תמול אנחנו ולא נדע כי צל ימינו עלי-ארץ
י. י הלא-הם יורוך יאמרו לך ומלבם יוצאו מלים
יא. יא היגאה-גמא בלא בצה ישגה-אחו בלי-מים
יב. יב עדנו באבו לא יקטף ולפני כל-חציר ייבש
יג. יג כן--ארחות כל-שכחי אל ותקות חנף תאבד
יד. יד אשר-יקוט כסלו ובית עכביש מבטחו
טו. טו ישען על-ביתו ולא יעמד יחזיק בו ולא יקום
טז. טז רטב הוא לפני-שמש ועל גנתו ינקתו תצא
יז. יז על-גל שרשיו יסבכו בית אבנים יחזה
יח. יח אם-יבלענו ממקמו וכחש בו לא ראיתיך
יט. יט הן-הוא משוש דרכו ומעפר אחר יצמחו
כ. כ הן-אל לא ימאס-תם ולא-יחזיק ביד-מרעים
כא. כא עד-ימלה שחוק פיך ושפתיך תרועה
כב. כב שנאיך ילבשו-בשת ואהל רשעים איננו
| 
