במדבר, Chapter 2 ב

א. א וידבר יהוה אל משה ואל אהרן לאמר    ב. ב איש על דגלו באתת לבית אבתם יחנו בני ישראל  מנגד סביב לאהל מועד יחנו    ג. ג והחנים קדמה מזרחה דגל מחנה יהודה לצבאתם ונשיא לבני יהודה נחשון בן עמינדב    ד. ד וצבאו ופקדיהם--ארבעה ושבעים אלף ושש מאות    ה. ה והחנים עליו מטה יששכר ונשיא לבני יששכר נתנאל בן צוער    ו. ו וצבאו ופקדיו--ארבעה וחמשים אלף וארבע מאות    ז. ז מטה זבולן ונשיא לבני זבולן אליאב בן חלן    ח. ח וצבאו ופקדיו--שבעה וחמשים אלף וארבע מאות    ט. ט כל הפקדים למחנה יהודה מאת אלף ושמנים אלף וששת אלפים וארבע מאות--לצבאתם ראשנה יסעו  {ס}    י. י דגל מחנה ראובן תימנה לצבאתם ונשיא לבני ראובן אליצור בן שדיאור    יא. יא וצבאו ופקדיו--ששה וארבעים אלף וחמש מאות    יב. יב והחונם עליו מטה שמעון ונשיא לבני שמעון שלמיאל בן צורישדי    יג. יג וצבאו ופקדיהם--תשעה וחמשים אלף ושלש מאות    יד. יד ומטה גד ונשיא לבני גד אליסף בן רעואל    טו. טו וצבאו ופקדיהם--חמשה וארבעים אלף ושש מאות וחמשים    טז. טז כל הפקדים למחנה ראובן מאת אלף ואחד וחמשים אלף וארבע מאות וחמשים--לצבאתם ושנים יסעו  {ס}    יז. יז ונסע אהל מועד מחנה הלוים בתוך המחנת כאשר יחנו כן יסעו איש על ידו לדגליהם  {ס}    יח. יח דגל מחנה אפרים לצבאתם ימה ונשיא לבני אפרים אלישמע בן עמיהוד    יט. יט וצבאו ופקדיהם--ארבעים אלף וחמש מאות    כ. כ ועליו מטה מנשה ונשיא לבני מנשה גמליאל בן פדהצור    כא. כא וצבאו ופקדיהם--שנים ושלשים אלף ומאתים    כב. כב ומטה בנימן ונשיא לבני בנימן אבידן בן גדעני    כג. כג וצבאו ופקדיהם--חמשה ושלשים אלף וארבע מאות    כד. כד כל הפקדים למחנה אפרים מאת אלף ושמנת אלפים ומאה--לצבאתם ושלשים יסעו  {ס}    כה. כה דגל מחנה דן צפנה לצבאתם ונשיא לבני דן אחיעזר בן עמישדי    כו. כו וצבאו ופקדיהם--שנים וששים אלף ושבע מאות    כז. כז והחנים עליו מטה אשר ונשיא לבני אשר פגעיאל בן עכרן    כח. כח וצבאו ופקדיהם--אחד וארבעים אלף וחמש מאות    כט. כט ומטה נפתלי ונשיא לבני נפתלי אחירע בן עינן    ל. ל וצבאו ופקדיהם--שלשה וחמשים אלף וארבע מאות    לא. לא כל הפקדים למחנה דן--מאת אלף ושבעה וחמשים אלף ושש מאות לאחרנה יסעו לדגליהם  {פ}    לב. לב אלה פקודי בני ישראל לבית אבתם  כל פקודי המחנת לצבאתם--שש מאות אלף ושלשת אלפים וחמש מאות וחמשים    לג. לג והלוים--לא התפקדו בתוך בני ישראל  כאשר צוה יהוה את משה    לד. לד ויעשו בני ישראל  ככל אשר צוה יהוה את משה כן חנו לדגליהם וכן נסעו--איש למשפחתיו על בית אבתיו  {פ}