א. א מענה-רך ישיב חמה ודבר-עצב יעלה-אף
ב. ב לשון חכמים תיטיב דעת ופי כסילים יביע אולת
ג. ג בכל-מקום עיני יהוה צפות רעים וטובים
ד. ד מרפא לשון עץ חיים וסלף בה שבר ברוח
ה. ה אויל--ינאץ מוסר אביו ושמר תוכחת יערים
ו. ו בית צדיק חסן רב ובתבואת רשע נעכרת
ז. ז שפתי חכמים יזרו דעת ולב כסילים לא-כן
ח. ח זבח רשעים תועבת יהוה ותפלת ישרים רצונו
ט. ט תועבת יהוה דרך רשע ומרדף צדקה יאהב
י. י מוסר רע לעזב ארח שונא תוכחת ימות
יא. יא שאול ואבדון נגד יהוה אף כי-לבות בני-אדם
יב. יב לא יאהב-לץ הוכח לו אל-חכמים לא ילך
יג. יג לב שמח ייטב פנים ובעצבת-לב רוח נכאה
יד. יד לב נבון יבקש-דעת ופני (ופי) כסילים ירעה אולת
טו. טו כל-ימי עני רעים וטוב-לב משתה תמיד
טז. טז טוב-מעט ביראת יהוה-- מאוצר רב ומהומה בו
יז. יז טוב ארחת ירק ואהבה-שם-- משור אבוס ושנאה-בו
יח. יח איש חמה יגרה מדון וארך אפים ישקיט ריב
יט. יט דרך עצל כמשכת חדק וארח ישרים סללה
כ. כ בן חכם ישמח-אב וכסיל אדם בוזה אמו
כא. כא אולת שמחה לחסר-לב ואיש תבונה יישר-לכת
כב. כב הפר מחשבות באין סוד וברב יועצים תקום
כג. כג שמחה לאיש במענה-פיו ודבר בעתו מה-טוב
כד. כד ארח חיים למעלה למשכיל-- למען סור משאול מטה
כה. כה בית גאים יסח יהוה ויצב גבול אלמנה
כו. כו תועבת יהוה מחשבות רע וטהרים אמרי-נעם
כז. כז עכר ביתו בוצע בצע ושונא מתנת יחיה
כח. כח לב צדיק יהגה לענות ופי רשעים יביע רעות
כט. כט רחוק יהוה מרשעים ותפלת צדיקים ישמע
ל. ל מאור-עינים ישמח-לב שמועה טובה תדשן-עצם
לא. לא אזן--שמעת תוכחת חיים בקרב חכמים תלין
לב. לב פורע מוסר מואס נפשו ושומע תוכחת קונה לב
לג. לג יראת יהוה מוסר חכמה ולפני כבוד ענוה
| 
