א. א לתאוה יבקש נפרד בכל-תושיה יתגלע
ב. ב לא-יחפץ כסיל בתבונה כי אם-בהתגלות לבו
ג. ג בבוא-רשע בא גם-בוז ועם-קלון חרפה
ד. ד מים עמקים דברי פי-איש נחל נבע מקור חכמה
ה. ה שאת פני-רשע לא-טוב-- להטות צדיק במשפט
ו. ו שפתי כסיל יבאו בריב ופיו למהלמות יקרא
ז. ז פי-כסיל מחתה-לו ושפתיו מוקש נפשו
ח. ח דברי נרגן כמתלהמים והם ירדו חדרי-בטן
ט. ט גם מתרפה במלאכתו-- אח הוא לבעל משחית
י. י מגדל-עז שם יהוה בו-ירוץ צדיק ונשגב
יא. יא הון עשיר קרית עזו וכחומה נשגבה במשכתו
יב. יב לפני-שבר יגבה לב-איש ולפני כבוד ענוה
יג. יג משיב דבר בטרם ישמע-- אולת היא-לו וכלמה
יד. יד רוח-איש יכלכל מחלהו ורוח נכאה מי ישאנה
טו. טו לב נבון יקנה-דעת ואזן חכמים תבקש-דעת
טז. טז מתן אדם ירחיב לו ולפני גדלים ינחנו
יז. יז צדיק הראשון בריבו יבא- (ובא-) רעהו וחקרו
יח. יח מדינים ישבית הגורל ובין עצומים יפריד
יט. יט אח--נפשע מקרית-עז ומדונים (ומדינים) כבריח ארמון
כ. כ מפרי פי-איש תשבע בטנו תבואת שפתיו ישבע
כא. כא מות וחיים ביד-לשון ואהביה יאכל פריה
כב. כב מצא אשה מצא טוב ויפק רצון מיהוה
כג. כג תחנונים ידבר-רש ועשיר יענה עזות
כד. כד איש רעים להתרעע ויש אהב דבק מאח
| 
