א. א גם-אלה משלי שלמה-- אשר העתיקו אנשי חזקיה מלך-יהודה
ב. ב כבד אלהים הסתר דבר וכבד מלכים חקר דבר
ג. ג שמים לרום וארץ לעמק ולב מלכים אין חקר
ד. ד הגו סיגים מכסף ויצא לצרף כלי
ה. ה הגו רשע לפני-מלך ויכון בצדק כסאו
ו. ו אל-תתהדר לפני-מלך ובמקום גדלים אל-תעמד
ז. ז כי טוב אמר-לך עלה-הנה מהשפילך לפני נדיב--אשר ראו עיניך
ח. ח אל-תצא לרב מהר פן מה-תעשה באחריתה--בהכלים אתך רעך
ט. ט ריבך ריב את-רעך וסוד אחר אל-תגל
י. י פן-יחסדך שמע ודבתך לא תשוב
יא. יא תפוחי זהב במשכיות כסף-- דבר דבר על-אפניו
יב. יב נזם זהב וחלי-כתם-- מוכיח חכם על-אזן שמעת
יג. יג כצנת שלג ביום קציר--ציר נאמן לשלחיו ונפש אדניו ישיב
יד. יד נשיאים ורוח וגשם אין-- איש מתהלל במתת-שקר
טו. טו בארך אפים יפתה קצין ולשון רכה תשבר-גרם
טז. טז דבש מצאת אכל דיך פן-תשבענו והקאתו
יז. יז הקר רגלך מבית רעך פן-ישבעך ושנאך
יח. יח מפיץ וחרב וחץ שנון-- איש ענה ברעהו עד שקר
יט. יט שן רעה ורגל מועדת-- מבטח בוגד ביום צרה
כ. כ מעדה-בגד ביום קרה--חמץ על-נתר ושר בשרים על לב-רע
כא. כא אם-רעב שנאך האכלהו לחם ואם-צמא השקהו מים
כב. כב כי גחלים--אתה חתה על-ראשו ויהוה ישלם-לך
כג. כג רוח צפון תחולל גשם ופנים נזעמים לשון סתר
כד. כד טוב שבת על-פנת-גג-- מאשת מדונים (מדינים) ובית חבר
כה. כה מים קרים על-נפש עיפה ושמועה טובה מארץ מרחק
כו. כו מעין נרפש ומקור משחת-- צדיק מט לפני-רשע
כז. כז אכל דבש הרבות לא-טוב וחקר כבדם כבוד
כח. כח עיר פרוצה אין חומה-- איש אשר אין מעצר לרוחו
| 
