א. א לדוד אודך בכל-לבי נגד אלהים אזמרך
ב. ב אשתחוה אל-היכל קדשך ואודה את-שמך-- על-חסדך ועל-אמתך כי-הגדלת על-כל-שמך אמרתך
ג. ג ביום קראתי ותענני תרהבני בנפשי עז
ד. ד יודוך יהוה כל-מלכי-ארץ כי שמעו אמרי-פיך
ה. ה וישירו בדרכי יהוה כי-גדול כבוד יהוה
ו. ו כי-רם יהוה ושפל יראה וגבה ממרחק יידע
ז. ז אם-אלך בקרב צרה-- תחיני על אף איבי תשלח ידך ותושיעני ימינך
ח. ח יהוה יגמר בעדי יהוה חסדך לעולם מעשי ידיך אל-תרף
| 
