א. א למנצח לדוד מזמור יהוה חקרתני ותדע
ב. ב אתה ידעת שבתי וקומי בנתה לרעי מרחוק
ג. ג ארחי ורבעי זרית וכל-דרכי הסכנתה
ד. ד כי אין מלה בלשוני הן יהוה ידעת כלה
ה. ה אחור וקדם צרתני ותשת עלי כפכה
ו. ו פלאיה (פליאה) דעת ממני נשגבה לא-אוכל לה
ז. ז אנה אלך מרוחך ואנה מפניך אברח
ח. ח אם אסק שמים שם אתה ואציעה שאול הנך
ט. ט אשא כנפי-שחר אשכנה באחרית ים
י. י גם-שם ידך תנחני ותאחזני ימינך
יא. יא ואמר אך-חשך ישופני ולילה אור בעדני
יב. יב גם-חשך לא-יחשיך ממך ולילה כיום יאיר-- כחשיכה כאורה
יג. יג כי-אתה קנית כליתי תסכני בבטן אמי
יד. יד אודך-- על כי נוראות נפליתי נפלאים מעשיך ונפשי ידעת מאד
טו. טו לא-נכחד עצמי ממך אשר-עשיתי בסתר רקמתי בתחתיות ארץ
טז. טז גלמי ראו עיניך ועל-ספרך כלם יכתבו ימים יצרו ולא (ולו) אחד בהם
יז. יז ולי--מה-יקרו רעיך אל מה עצמו ראשיהם
יח. יח אספרם מחול ירבון הקיצתי ועודי עמך
יט. יט אם-תקטל אלוה רשע ואנשי דמים סורו מני
כ. כ אשר ימרוך למזמה נשוא לשוא עריך
כא. כא הלוא-משנאיך יהוה אשנא ובתקוממיך אתקוטט
כב. כב תכלית שנאה שנאתים לאויבים היו לי
כג. כג חקרני אל ודע לבבי בחנני ודע שרעפי
כד. כד וראה אם-דרך-עצב בי ונחני בדרך עולם
| 
