א. א מזמור לדוד יהוה שמע תפלתי-- האזינה אל-תחנוני באמנתך ענני בצדקתך
ב. ב ואל-תבוא במשפט את-עבדך כי לא-יצדק לפניך כל-חי
ג. ג כי רדף אויב נפשי-- דכא לארץ חיתי הושבני במחשכים כמתי עולם
ד. ד ותתעטף עלי רוחי בתוכי ישתומם לבי
ה. ה זכרתי ימים מקדם-- הגיתי בכל-פעלך במעשה ידיך אשוחח
ו. ו פרשתי ידי אליך נפשי כארץ-עיפה לך סלה
ז. ז מהר ענני יהוה-- כלתה רוחי אל-תסתר פניך ממני ונמשלתי עם-ירדי בור
ח. ח השמיעני בבקר חסדך-- כי-בך בטחתי הודיעני דרך-זו אלך-- כי-אליך נשאתי נפשי
ט. ט הצילני מאיבי יהוה-- אליך כסתי
י. י למדני לעשות רצונך-- כי-אתה אלוהי רוחך טובה תנחני בארץ מישור
יא. יא למען-שמך יהוה תחיני בצדקתך תוציא מצרה נפשי
יב. יב ובחסדך תצמית איבי והאבדת כל-צררי נפשי--כי אני עבדך
| 
