א. א תהלה לדוד ארוממך אלוהי המלך ואברכה שמך לעולם ועד
ב. ב בכל-יום אברכך ואהללה שמך לעולם ועד
ג. ג גדול יהוה ומהלל מאד ולגדלתו אין חקר
ד. ד דור לדור ישבח מעשיך וגבורתיך יגידו
ה. ה הדר כבוד הודך-- ודברי נפלאתיך אשיחה
ו. ו ועזוז נוראתיך יאמרו וגדלותיך (וגדלתך) אספרנה
ז. ז זכר רב-טובך יביעו וצדקתך ירננו
ח. ח חנון ורחום יהוה ארך אפים וגדל-חסד
ט. ט טוב-יהוה לכל ורחמיו על-כל-מעשיו
י. י יודוך יהוה כל-מעשיך וחסידיך יברכוכה
יא. יא כבוד מלכותך יאמרו וגבורתך ידברו
יב. יב להודיע לבני האדם--גבורתיו וכבוד הדר מלכותו
יג. יג מלכותך מלכות כל-עלמים וממשלתך בכל-דור ודר
יד. יד סומך יהוה לכל-הנפלים וזוקף לכל-הכפופים
טו. טו עיני-כל אליך ישברו ואתה נותן-להם את-אכלם בעתו
טז. טז פותח את-ידך ומשביע לכל-חי רצון
יז. יז צדיק יהוה בכל-דרכיו וחסיד בכל-מעשיו
יח. יח קרוב יהוה לכל-קראיו-- לכל אשר יקראהו באמת
יט. יט רצון-יראיו יעשה ואת-שועתם ישמע ויושיעם
כ. כ שומר יהוה את-כל-אהביו ואת כל-הרשעים ישמיד
כא. כא תהלת יהוה ידבר-פי ויברך כל-בשר שם קדשו--לעולם ועד
| 
