א. א הללו-יה הללי נפשי את-יהוה
ב. ב אהללה יהוה בחיי אזמרה לאלהי בעודי
ג. ג אל-תבטחו בנדיבים-- בבן-אדם שאין לו תשועה
ד. ד תצא רוחו ישב לאדמתו ביום ההוא אבדו עשתנתיו
ה. ה אשרי--שאל יעקב בעזרו שברו על-יהוה אלהיו
ו. ו עשה שמים וארץ-- את-הים ואת-כל-אשר-בם השמר אמת לעולם
ז. ז עשה משפט לעשוקים--נתן לחם לרעבים יהוה מתיר אסורים
ח. ח יהוה פקח עורים--יהוה זקף כפופים יהוה אהב צדיקים
ט. ט יהוה שמר את-גרים--יתום ואלמנה יעודד ודרך רשעים יעות
י. י ימלך יהוה לעולם-- אלהיך ציון לדר ודר הללו-יה
| 
