א. א לדוד אליך יהוה נפשי אשא
ב. ב אלהי--בך בטחתי אל-אבושה אל-יעלצו אויבי לי
ג. ג גם כל-קויך לא יבשו יבשו הבוגדים ריקם
ד. ד דרכיך יהוה הודיעני ארחותיך למדני
ה. ה הדריכני באמתך ולמדני-- כי-אתה אלהי ישעי אותך קויתי כל-היום
ו. ו זכר-רחמיך יהוה וחסדיך כי מעולם המה
ז. ז חטאות נעורי ופשעי-- אל-תזכר כחסדך זכר-לי-אתה-- למען טובך יהוה
ח. ח טוב-וישר יהוה על-כן יורה חטאים בדרך
ט. ט ידרך ענוים במשפט וילמד ענוים דרכו
י. י כל-ארחות יהוה חסד ואמת-- לנצרי בריתו ועדתיו
יא. יא למען-שמך יהוה וסלחת לעוני כי רב-הוא
יב. יב מי-זה האיש ירא יהוה-- יורנו בדרך יבחר
יג. יג נפשו בטוב תלין וזרעו יירש ארץ
יד. יד סוד יהוה ליראיו ובריתו להודיעם
טו. טו עיני תמיד אל-יהוה כי הוא-יוציא מרשת רגלי
טז. טז פנה-אלי וחנני כי-יחיד ועני אני
יז. יז צרות לבבי הרחיבו ממצוקותי הוציאני
יח. יח ראה עניי ועמלי ושא לכל-חטאותי
יט. יט ראה-איבי כי-רבו ושנאת חמס שנאוני
כ. כ שמרה נפשי והצילני אל-אבוש כי-חסיתי בך
כא. כא תם-וישר יצרוני כי קויתיך
כב. כב פדה אלהים את-ישראל-- מכל צרותיו
| 
