א. א לדוד שפטני יהוה-- כי-אני בתמי הלכתי וביהוה בטחתי לא אמעד
ב. ב בחנני יהוה ונסני צרופה (צרפה) כליותי ולבי
ג. ג כי-חסדך לנגד עיני והתהלכתי באמתך
ד. ד לא-ישבתי עם-מתי-שוא ועם נעלמים לא אבוא
ה. ה שנאתי קהל מרעים ועם-רשעים לא אשב
ו. ו ארחץ בנקיון כפי ואסבבה את-מזבחך יהוה
ז. ז לשמע בקול תודה ולספר כל-נפלאותיך
ח. ח יהוה--אהבתי מעון ביתך ומקום משכן כבודך
ט. ט אל-תאסף עם-חטאים נפשי ועם-אנשי דמים חיי
י. י אשר-בידיהם זמה וימינם מלאה שחד
יא. יא ואני בתמי אלך פדני וחנני
יב. יב רגלי עמדה במישור במקהלים אברך יהוה
| 
