א. א לדוד-- בשנותו את-טעמו לפני אבימלך ויגרשהו וילך
ב. ב אברכה את-יהוה בכל-עת תמיד תהלתו בפי
ג. ג ביהוה תתהלל נפשי ישמעו ענוים וישמחו
ד. ד גדלו ליהוה אתי ונרוממה שמו יחדו
ה. ה דרשתי את-יהוה וענני ומכל-מגורותי הצילני
ו. ו הביטו אליו ונהרו ופניהם אל-יחפרו
ז. ז זה עני קרא ויהוה שמע ומכל-צרותיו הושיעו
ח. ח חנה מלאך-יהוה סביב ליראיו ויחלצם
ט. ט טעמו וראו כי-טוב יהוה אשרי הגבר יחסה-בו
י. י יראו את-יהוה קדשיו כי-אין מחסור ליראיו
יא. יא כפירים רשו ורעבו ודרשי יהוה לא-יחסרו כל-טוב
יב. יב לכו-בנים שמעו-לי יראת יהוה אלמדכם
יג. יג מי-האיש החפץ חיים אהב ימים לראות טוב
יד. יד נצר לשונך מרע ושפתיך מדבר מרמה
טו. טו סור מרע ועשה-טוב בקש שלום ורדפהו
טז. טז עיני יהוה אל-צדיקים ואזניו אל-שועתם
יז. יז פני יהוה בעשי רע להכרית מארץ זכרם
יח. יח צעקו ויהוה שמע ומכל-צרותם הצילם
יט. יט קרוב יהוה לנשברי-לב ואת-דכאי-רוח יושיע
כ. כ רבות רעות צדיק ומכלם יצילנו יהוה
כא. כא שמר כל-עצמותיו אחת מהנה לא נשברה
כב. כב תמותת רשע רעה ושנאי צדיק יאשמו [ (Psalms 34:23) כג פדה יהוה נפש עבדיו ולא יאשמו כל-החסים בו ]
| 
