א. א לדוד ריבה יהוה את-יריבי לחם את-לחמי
ב. ב החזק מגן וצנה וקומה בעזרתי
ג. ג והרק חנית וסגר לקראת רדפי אמר לנפשי ישעתך אני
ד. ד יבשו ויכלמו מבקשי נפשי יסגו אחור ויחפרו--חשבי רעתי
ה. ה יהיו כמץ לפני-רוח ומלאך יהוה דוחה
ו. ו יהי-דרכם חשך וחלקלקת ומלאך יהוה רדפם
ז. ז כי-חנם טמנו-לי שחת רשתם חנם חפרו לנפשי
ח. ח תבואהו שואה לא-ידע ורשתו אשר-טמן תלכדו בשואה יפל-בה
ט. ט ונפשי תגיל ביהוה תשיש בישועתו
י. י כל עצמותי תאמרנה-- יהוה מי כמוך מציל עני מחזק ממנו ועני ואביון מגזלו
יא. יא יקומון עדי חמס אשר לא-ידעתי ישאלוני
יב. יב ישלמוני רעה תחת טובה שכול לנפשי
יג. יג ואני בחלותם לבושי שק-- עניתי בצום נפשי ותפלתי על-חיקי תשוב
יד. יד כרע-כאח לי התהלכתי כאבל-אם קדר שחותי
טו. טו ובצלעי שמחו ונאספו נאספו עלי נכים ולא ידעתי קרעו ולא-דמו
טז. טז בחנפי לעגי מעוג-- חרק עלי שנימו
יז. יז אדני כמה תראה השיבה נפשי משאיהם מכפירים יחידתי
יח. יח אודך בקהל רב בעם עצום אהללך
יט. יט אל-ישמחו-לי איבי שקר שנאי חנם יקרצו-עין
כ. כ כי לא שלום ידברו ועל רגעי-ארץ--דברי מרמות יחשבון
כא. כא וירחיבו עלי פיהם אמרו האח האח ראתה עיננו
כב. כב ראיתה יהוה אל-תחרש אדני אל-תרחק ממני
כג. כג העירה והקיצה למשפטי אלהי ואדני לריבי
כד. כד שפטני כצדקך יהוה אלהי ואל-ישמחו-לי
כה. כה אל-יאמרו בלבם האח נפשנו אל-יאמרו בלענוהו
כו. כו יבשו ויחפרו יחדו-- שמחי רעתי ילבשו-בשת וכלמה-- המגדילים עלי
כז. כז ירנו וישמחו חפצי צדקי ויאמרו תמיד יגדל יהוה החפץ שלום עבדו
כח. כח ולשוני תהגה צדקך כל-היום תהלתך
| 
