א. א למנצח לידיתון (לידותון) מזמור לדוד
ב. ב אמרתי-- אשמרה דרכי מחטוא בלשוני אשמרה לפי מחסום-- בעד רשע לנגדי
ג. ג נאלמתי דומיה החשיתי מטוב וכאבי נעכר
ד. ד חם-לבי בקרבי--בהגיגי תבער-אש דברתי בלשוני
ה. ה הודיעני יהוה קצי--ומדת ימי מה-היא אדעה מה-חדל אני
ו. ו הנה טפחות נתתה ימי-- וחלדי כאין נגדך אך כל-הבל כל-אדם נצב סלה
ז. ז אך-בצלם יתהלך-איש-- אך-הבל יהמיון יצבר ולא-ידע מי-אספם
ח. ח ועתה מה-קויתי אדני-- תוחלתי לך היא
ט. ט מכל-פשעי הצילני חרפת נבל אל-תשימני
י. י נאלמתי לא אפתח-פי כי אתה עשית
יא. יא הסר מעלי נגעך מתגרת ידך אני כליתי
יב. יב בתוכחות על-עון יסרת איש-- ותמס כעש חמודו אך הבל כל-אדם סלה
יג. יג שמעה תפלתי יהוה ושועתי האזינה-- אל-דמעתי אל-תחרש כי גר אנכי עמך תושב ככל-אבותי [ (Psalms 39:14) יד השע ממני ואבליגה-- בטרם אלך ואינני ]
| 
