א. א למנצח לבני-קרח משכיל
ב. ב אלהים באזנינו שמענו-- אבותינו ספרו-לנו פעל פעלת בימיהם בימי קדם
ג. ג אתה ידך גוים הורשת-- ותטעם תרע לאמים ותשלחם
ד. ד כי לא בחרבם ירשו ארץ וזרועם לא-הושיעה-למו כי-ימינך וזרועך ואור פניך-- כי רציתם
ה. ה אתה-הוא מלכי אלהים צוה ישועות יעקב
ו. ו בך צרינו ננגח בשמך נבוס קמינו
ז. ז כי לא בקשתי אבטח וחרבי לא תושיעני
ח. ח כי הושעתנו מצרינו ומשנאינו הבישות
ט. ט באלהים הללנו כל-היום ושמך לעולם נודה סלה
י. י אף-זנחת ותכלימנו ולא-תצא בצבאותינו
יא. יא תשיבנו אחור מני-צר ומשנאינו שסו למו
יב. יב תתננו כצאן מאכל ובגוים זריתנו
יג. יג תמכר-עמך בלא-הון ולא-רבית במחיריהם
יד. יד תשימנו חרפה לשכנינו לעג וקלס לסביבותינו
טו. טו תשימנו משל בגוים מנוד-ראש בלאמים
טז. טז כל-היום כלמתי נגדי ובשת פני כסתני
יז. יז מקול מחרף ומגדף מפני אויב ומתנקם
יח. יח כל-זאת באתנו ולא שכחנוך ולא-שקרנו בבריתך
יט. יט לא-נסוג אחור לבנו ותט אשרינו מני ארחך
כ. כ כי דכיתנו במקום תנים ותכס עלינו בצלמות
כא. כא אם-שכחנו שם אלהינו ונפרש כפינו לאל זר
כב. כב הלא אלהים יחקר-זאת כי-הוא ידע תעלמות לב
כג. כג כי-עליך הרגנו כל-היום נחשבנו כצאן טבחה
כד. כד עורה למה תישן אדני הקיצה אל-תזנח לנצח
כה. כה למה-פניך תסתיר תשכח ענינו ולחצנו
כו. כו כי שחה לעפר נפשנו דבקה לארץ בטננו [ (Psalms 44:27) כז קומה עזרתה לנו ופדנו למען חסדך ]
| 
