א. א למנצח בנגינת משכיל לדוד
ב. ב האזינה אלהים תפלתי ואל-תתעלם מתחנתי
ג. ג הקשיבה לי וענני אריד בשיחי ואהימה
ד. ד מקול אויב--מפני עקת רשע כי-ימיטו עלי און ובאף ישטמוני
ה. ה לבי יחיל בקרבי ואימות מות נפלו עלי
ו. ו יראה ורעד יבא בי ותכסני פלצות
ז. ז ואמר--מי-יתן-לי אבר כיונה אעופה ואשכנה
ח. ח הנה ארחיק נדד אלין במדבר סלה
ט. ט אחישה מפלט לי-- מרוח סעה מסער
י. י בלע אדני פלג לשונם כי-ראיתי חמס וריב בעיר
יא. יא יומם ולילה--יסובבה על-חומתיה ואון ועמל בקרבה
יב. יב הוות בקרבה ולא-ימיש מרחבה תך ומרמה
יג. יג כי לא-אויב יחרפני ואשא לא-משנאי עלי הגדיל ואסתר ממנו
יד. יד ואתה אנוש כערכי אלופי ומידעי
טו. טו אשר יחדו נמתיק סוד בבית אלהים נהלך ברגש
טז. טז ישימות (ישי מות) עלימו--ירדו שאול חיים כי-רעות במגורם בקרבם
יז. יז אני אל-אלהים אקרא ויהוה יושיעני
יח. יח ערב ובקר וצהרים אשיחה ואהמה וישמע קולי
יט. יט פדה בשלום נפשי מקרב-לי כי-ברבים היו עמדי
כ. כ ישמע אל ויענם-- וישב קדם סלה אשר אין חליפות למו ולא יראו אלהים
כא. כא שלח ידיו בשלמיו חלל בריתו
כב. כב חלקו מחמאת פיו-- וקרב-לבו רכו דבריו משמן והמה פתחות
כג. כג השלך על-יהוה יהבך-- והוא יכלכלך לא-יתן לעולם מוט-- לצדיק [ (Psalms 55:24) כד ואתה אלהים תורדם לבאר שחת-- אנשי דמים ומרמה לא-יחצו ימיהם ואני אבטח-בך ]
| 
