א. א למנצח שיר מזמור הריעו לאלהים כל-הארץ
ב. ב זמרו כבוד-שמו שימו כבוד תהלתו
ג. ג אמרו לאלהים מה-נורא מעשיך ברב עזך יכחשו לך איביך
ד. ד כל-הארץ ישתחוו לך--ויזמרו-לך יזמרו שמך סלה
ה. ה לכו וראו מפעלות אלהים נורא עלילה על-בני אדם
ו. ו הפך ים ליבשה--בנהר יעברו ברגל שם נשמחה-בו
ז. ז משל בגבורתו עולם-- עיניו בגוים תצפינה הסוררים אל-ירימו (ירומו) למו סלה
ח. ח ברכו עמים אלהינו והשמיעו קול תהלתו
ט. ט השם נפשנו בחיים ולא-נתן למוט רגלנו
י. י כי-בחנתנו אלהים צרפתנו כצרף-כסף
יא. יא הבאתנו במצודה שמת מועקה במתנינו
יב. יב הרכבת אנוש לראשנו באנו-באש ובמים ותוציאנו לרויה
יג. יג אבוא ביתך בעולות אשלם לך נדרי
יד. יד אשר-פצו שפתי ודבר-פי בצר-לי
טו. טו עלות מיחים אעלה-לך עם-קטרת אילים אעשה בקר עם-עתודים סלה
טז. טז לכו-שמעו ואספרה כל-יראי אלהים אשר עשה לנפשי
יז. יז אליו פי-קראתי ורומם תחת לשוני
יח. יח און אם-ראיתי בלבי-- לא ישמע אדני
יט. יט אכן שמע אלהים הקשיב בקול תפלתי
כ. כ ברוך אלהים-- אשר לא-הסיר תפלתי וחסדו מאתי
| 
