א. א בך-יהוה חסיתי אל-אבושה לעולם
ב. ב בצדקתך תצילני ותפלטני הטה-אלי אזנך והושיעני
ג. ג היה לי לצור מעון לבוא-- תמיד צוית להושיעני כי-סלעי ומצודתי אתה
ד. ד אלהי--פלטני מיד רשע מכף מעול וחומץ
ה. ה כי-אתה תקותי אדני יהוה מבטחי מנעורי
ו. ו עליך נסמכתי מבטן--ממעי אמי אתה גוזי בך תהלתי תמיד
ז. ז כמופת הייתי לרבים ואתה מחסי-עז
ח. ח ימלא פי תהלתך כל-היום תפארתך
ט. ט אל-תשליכני לעת זקנה ככלות כחי אל-תעזבני
י. י כי-אמרו אויבי לי ושמרי נפשי נועצו יחדו
יא. יא לאמר אלהים עזבו רדפו ותפשוהו כי-אין מציל
יב. יב אלהים אל-תרחק ממני אלהי לעזרתי חישה (חושה)
יג. יג יבשו יכלו שטני נפשי יעטו חרפה וכלמה--מבקשי רעתי
יד. יד ואני תמיד איחל והוספתי על-כל-תהלתך
טו. טו פי יספר צדקתך--כל-היום תשועתך כי לא ידעתי ספרות
טז. טז אבוא--בגברות אדני יהוה אזכיר צדקתך לבדך
יז. יז אלהים למדתני מנעורי ועד-הנה אגיד נפלאותיך
יח. יח וגם עד-זקנה ושיבה-- אלהים אל-תעזבני עד-אגיד זרועך לדור לכל-יבוא גבורתך
יט. יט וצדקתך אלהים עד-מרום אשר-עשית גדלות אלהים מי כמוך
כ. כ אשר הראיתנו (הראיתני) צרות רבות-- ורעות תשוב תחינו (תחיני) ומתהמות הארץ תשוב תעלני
כא. כא תרב גדלתי ותסב תנחמני
כב. כב גם-אני אודך בכלי-נבל-- אמתך אלהי אזמרה לך בכנור-- קדוש ישראל
כג. כג תרננה שפתי כי אזמרה-לך ונפשי אשר פדית
כד. כד גם-לשוני-- כל-היום תהגה צדקתך כי-בשו כי-חפרו מבקשי רעתי
| 
