א. א למנצח אל-ששנים עדות לאסף מזמור
ב. ב רעה ישראל האזינה-- נהג כצאן יוסף ישב הכרובים הופיעה
ג. ג לפני אפרים ובנימן ומנשה-- עוררה את-גבורתך ולכה לישעתה לנו
ד. ד אלהים השיבנו והאר פניך ונושעה
ה. ה יהוה אלהים צבאות-- עד-מתי עשנת בתפלת עמך
ו. ו האכלתם לחם דמעה ותשקמו בדמעות שליש
ז. ז תשימנו מדון לשכנינו ואיבינו ילעגו-למו
ח. ח אלהים צבאות השיבנו והאר פניך ונושעה
ט. ט גפן ממצרים תסיע תגרש גוים ותטעה
י. י פנית לפניה ותשרש שרשיה ותמלא-ארץ
יא. יא כסו הרים צלה וענפיה ארזי-אל
יב. יב תשלח קצירה עד-ים ואל-נהר יונקותיה
יג. יג למה פרצת גדריה וארוה כל-עברי דרך
יד. יד יכרסמנה חזיר מיער וזיז שדי ירענה
טו. טו אלהים צבאות שוב-נא הבט משמים וראה ופקד גפן זאת
טז. טז וכנה אשר-נטעה ימינך ועל-בן אמצתה לך
יז. יז שרפה באש כסוחה מגערת פניך יאבדו
יח. יח תהי-ידך על-איש ימינך על-בן-אדם אמצת לך
יט. יט ולא-נסוג ממך תחינו ובשמך נקרא [ (Psalms 80:20) כ יהוה אלהים צבאות השיבנו האר פניך ונושעה ]
| 
