א. א תפלה לדוד הטה-יהוה אזנך ענני-- כי-עני ואביון אני
ב. ב שמרה נפשי כי-חסיד אני הושע עבדך אתה אלהי-- הבוטח אליך
ג. ג חנני אדני כי אליך אקרא כל-היום
ד. ד שמח נפש עבדך כי אליך אדני נפשי אשא
ה. ה כי-אתה אדני טוב וסלח ורב-חסד לכל-קראיך
ו. ו האזינה יהוה תפלתי והקשיבה בקול תחנונותי
ז. ז ביום צרתי אקראך כי תענני
ח. ח אין-כמוך באלהים אדני ואין כמעשיך
ט. ט כל-גוים אשר עשית--יבואו וישתחוו לפניך אדני ויכבדו לשמך
י. י כי-גדול אתה ועשה נפלאות אתה אלהים לבדך
יא. יא הורני יהוה דרכך-- אהלך באמתך יחד לבבי ליראה שמך
יב. יב אודך אדני אלהי--בכל-לבבי ואכבדה שמך לעולם
יג. יג כי-חסדך גדול עלי והצלת נפשי משאול תחתיה
יד. יד אלהים זדים קמו-עלי ועדת עריצים בקשו נפשי ולא שמוך לנגדם
טו. טו ואתה אדני אל-רחום וחנון ארך אפים ורב-חסד ואמת
טז. טז פנה אלי וחנני תנה-עזך לעבדך והושיעה לבן-אמתך
יז. יז עשה-עמי אות לטובה ויראו שנאי ויבשו-- כי-אתה יהוה עזרתני ונחמתני
| 
