א. א ישב בסתר עליון בצל שדי יתלונן
ב. ב אמר--ליהוה מחסי ומצודתי אלהי אבטח-בו
ג. ג כי הוא יצילך מפח יקוש מדבר הוות
ד. ד באברתו יסך לך--ותחת-כנפיו תחסה צנה וסחרה אמתו
ה. ה לא-תירא מפחד לילה מחץ יעוף יומם
ו. ו מדבר באפל יהלך מקטב ישוד צהרים
ז. ז יפל מצדך אלף--ורבבה מימינך אליך לא יגש
ח. ח רק בעיניך תביט ושלמת רשעים תראה
ט. ט כי-אתה יהוה מחסי עליון שמת מעונך
י. י לא-תאנה אליך רעה ונגע לא-יקרב באהלך
יא. יא כי מלאכיו יצוה-לך לשמרך בכל-דרכיך
יב. יב על-כפים ישאונך פן-תגף באבן רגלך
יג. יג על-שחל ופתן תדרך תרמס כפיר ותנין
יד. יד כי בי חשק ואפלטהו אשגבהו כי-ידע שמי
טו. טו יקראני ואענהו--עמו-אנכי בצרה אחלצהו ואכבדהו
טז. טז ארך ימים אשביעהו ואראהו בישועתי
| 
