א. ועל־דבר ישוע המשיח אדנינו אשר יבוא ואשר יקבצנו אליו זאת בקשתנו מכם אחי
ב. אל־נא יתר לבכם פתאם ואל־תחילו לא מפני־רוח ולא מפני שמועה ולא מפני אגרת אשר יאמרון כי יצאה מידינו לאמר יום המשיח הנה בא
ג. אל־יוליך אתכם איש לתהו ולא תאבו לו כי לא־יבוא אם־לא בראשונה יהיה המעל ונגלה איש החטאה בן־האבדון
ד. אשר יתקומם ויתגדל על־כל־אל ועבדת השם עד־כי גם־ישב בהיכל אלהים כאלהים לאמר הוא האלהים
ה. הלא תזכרו כי דברתי אליכם כדברים האלה בעוד הייתי עמכם
ו. וכן ידעתם את־אשר יעצרנו עתה למען יגלה בעתו
ז. כי סוד הפשע כבר החל להוציא פעלתו אפס העצר יעצרנו עד אשר יוסר מתוך המסילה
ח. ואז יגלה הפשע אשר ימיתנו האדון ישוע ברוח שפתיו ובברק פניו יכחידנו
ט. זה הוא אשר יבוא כשטן בעלילותיו ברב־כח באתת ובמופתים ממקור אכזב
י. ובכל־און ורמיה בין האבדים הלא הם אשר לא רצו להושע באהבת האמת
יא. ובעבור זאת ישלח בם אלהים משאות שוא ומדוחים למען יאמינו בשקר
יב. ויאשמו כל־אלה אשר לא שעו אל־דברי אמת ואחרי און לבם הלך
יג. ואנחנו אחים נכון לבנו להודות לאלהים תמיד עליכם בחירי אדנינו כי מראשית בחר בכם אלהים ויהי לכם לישועה אחרי אשר התקדשתם ברוח ואמונתכם אמת
יד. והוא קרא אתכם לכל־אלה על־פי בשרתנו לתת לכם חלק בכבוד ישוע המשיח אדנינו
טו. ועתה אחי עמדו הכן והחזיקו בלקח הנתון לכם על־דברי פינו או על־פי אגרתנו
טז. וישוע המשיח אדנינו ואבינו אלהינו אשר אהב אתנו ובחסדו נתן לנו נחם עדי־עד ותקוה טובה
יז. הוא ינחם את־לבכם ויכונן אתם בכל־מעשה טוב ובכל־דבר
| 
