א. יהודה עבד ישוע המשיח ואחי יעקב אל־המקראים באלהים האב ואהובים נצורי ישוע המשיח
ב. חסד שלום ואהבה ירביון לכם
ג. ידידים כאשר חשתי לכתב אליכם לפי כל־חפצי על־דבר ישועת כלנו הציקתני רוחי לעורר אתכם במכתבי להלחם מלחמות אמונה אשר נתנה כליל לקדשים
ד. כי באו אנשים בהתגנבם בתוכנו אשר נקבו מאז לנפל בידי המשפט אנשי רשע ההפכים חסד אלהינו לדבר בליעל ובאדנינו משל יחיד ישוע המשיח יכחשו לאמר לא הוא
ה. ואני להעלות על־לבכם חפצתי את־כל־אשר ידעתם מאז כי אחרי אשר גאל יהוה את־העם מארץ מצרים האביד אתם אשר לא האמינו
ו. ואת־המלאכים אשר לא־שמרו את־ממשלתם ואת־מעונם עזבו הסגירם לגיא צלמות אסורים במוסרות למשפט היום הגדול
ז. כסדם ועמרה והערים מסביב אשר זנו בדרכי זנוניהם ואל־בשר זרים עגבו נמנו לנקמת אש עולם להיות לאות דראון לכל־בשר
ח. וכמו־כן חלמי החלמות האלה אשר יטמאו את־הבשר יבזו שרי מעלה ועל־אדירים יביעו עתק
ט. ומיכאל השר הגדול למלאכים כאשר רב עם־השטן במריבת גוית משה לא־הביע עתק עליו במשפט רק אמר יגער יהוה בך
י. אך אלה יחרפון ולא ידעון מה ומה אשר ידעון כחק־בהמות אין תבונה בם יהפך עליהם למשחית
יא. אוי להם כי־הלכו בדרך קין ועקב שכר נדחו בתעתעי בלעם וכמו במרד קרח ירדו לאבדון
יב. צורי מכשל הם על־דרכיכם ישבים אתכם למשתה אהבים ורעים את־נפשם ולא ידעו בשת נשיאים נדפים ברוח ואין גשם עצים בשלכת ואין פרי ומתים מות משנה מענף ועד־שרש
יג. גלים סערים בים אשר יגרשו רפש בשתם כוכבים נבכים אשר־חשך אפלה צפון להם עדי־עד
יד. ועל־אלה נבא שביעי לאדם הוא חנוך לאמר הנה בא יהוה ורבבות קדשיו עמו
טו. לעשות משפט בכל ולהוכיח את־בני בליעל כלם על־כל־אשר הרשיעו לעשות ועל־כל־דברי עתק אשר דברו־בו החטאים בזדון
טז. אלה הם רגנים מתלוננים וזנים אחרי תאותם אשר פיהם ידבר גדלות ונשאים פנים בעד בצע כסף
יז. אך אתם ידידים זכרו את־הדברים אשר נאמרו מקדם ביד שליחי אדנינו ישוע המשיח
יח. את אשר הגידו לכם כי באחרית הימים יקומו לצים רדפי תאוה לפי שרירות לבם הרע
יט. הלא הם המתגדדים לגדודים בעלי־נפש ורוח אין בהם
כ. ואתם ידידם השיבו נפשכם באמונה אשר היא לכם קדש קדשים וחלו פני־אל ברוח הקדש
כא. ושמרתם את־נפשתיכם באהבת אלהים ולחסדי ישוע המשיח אדנינו חכה תחכו לחיי עולם
כב. ואת־אלה המתגדדים יסר תיסרון אתם בחמלה
כג. ויש מהם אשר תושיעון והצילו אתם כאוד משרפה ויש מהם אשר עליהם תחוסו ברעדה ושקץ תשקצו את־הבגד המגאל מזוב הבשר
כד. והוא אשר בידו לשמרכם ממוקש ולהקימכם תמימים לפני כבודו בששון רב
כה. אלהים החכם לבדו הגאל אתנו לו הכבוד והגדלה והממשלה והגבורה מעולם ועד־עתה ועד־עולמי עולמים אמן
| 
