1. Den landsluten som fall på Josefs-borni, tok til aust med Jordan-åi, der ho renn frammed Jeriko, og gjekk um Jeriko-kjelda gjenom øydemarki som stig frå Jeriko uppyver fjellet til Betel.
2. Frå Betel heldt bytestrengen fram til Luz og gjekk so burtyver til arkit-eigni, til Atarot;
3. der tok han vestetter ned til jafletit-eigni, heldt fram til Nedre Bet-Horon-eigni og Geser og enda utmed havet.
4. Dette var det landet som Josefs-borni, Manasse og Efra'im, fekk til odel og eiga.
5. Landet åt Efra'ims-borni og ættgreinene deira låg soleis til: Fylkesdeilet gjekk på austkanten frammed Atrot-Addar, tok burtetter til Øvre Bet-Horon
6. og enda utmed havet. På nordsida gjekk fylkesdeilet frammed Mikmetat og vende seg austetter til Ta'anat-Silo; sidan heldt bytestrengen fram i aust til Janoah
7. og tok frå Janoah ned til Atarot og Na'ara, strauk frammed Jeriko og gjekk ut i Jordan.
8. Frå Tappuah gjekk fylkesdeilet vestetter til Kanabekken og enda utmed havet. Dette var odelseiga åt Efra'ims-borni og ættgreinene deira,
9. og attåt det dei byane som vart utskilde åt Efra'ims-borni i Manasse-fylket, både byane og grendene som låg ikring.
10. Men Efra'ims-borni dreiv ikkje ut dei kana'anitane som budde i Geser; kana'anitane vart buande i Efra'ims-fylket, som dei gjer den dag i dag, men laut gjera trælearbeid.
| 
