Genesis, Chapter 29 ܟܛ

ܐ. ונטל יעקב בקלילותא ריגלוי לטיילא ואזל לארע בני מדינחא    ܒ. וחמא והא בירא בחקלא והא תמן תלתא עדרין דעאן רביעין עלה ארום מן בירא ההיא משׁקן עדריא ואבנא רבתא מחתא על פם בירא    ܓ. ומתכנשׁין תמן כל עדריא ומגלגלין ית אבנא מעל פם בירא ומשׁקן ית ענא ומתיבין ית אבנא על פם בירא לאתרא    ܕ. ואמר להום יעקב אחי מנן אתון ואמרו מחרן אנחנא    ܗ. ואמר להום הידעתון ית לבן בר נחור ואמרו ידענא    ܘ. ואמר השׁלם ליה ואמרו שׁלם והא רחל ברתיה אתיה עם ענא    ܙ. ואמר הא עדן יומא סגי לא עידן למיכנושׁ בעיר אשׁקו ענא ואיזילו רעו    ܚ. ואמרו לא ניכול עד די יתכנשׁון כל עדריא ויגלגלון ית אבנא מעל פם בירא ונשׁקי ענא    ܛ. עד דהוא ממלל עמהון ורחל אתת עם ענא דלאבוהא ארום רעיתא היא בההוא זימנא ארום הוה מחתא דייי בענא דלבן ולא אשׁתיירו מינהון אלהין קלילין ותריך רעיא דיליה ומה דאשׁתארו שׁוי קדם רחל ברתיה    ܝ. והוה כדי חמא יעקב ית רחל ברת לבן אחוהא דאימיה וקריב יעקב וגלגיל ית אבנא בחדא מן אדרעוי מעילוי פם בירא וטפת בירא וסליקו מיא לאנפוי ואשׁקי ית ענא דלבן אחוהא דאימיה והוות טייפא עשׁרין שׁנין    ܝܐ. ונשׁק יעקב לרחל וארים ית קליה ובכא    ܝܒ. ותני יעקב לרחל ארום לאיתותבא עם אבוהא אתא ולמיסב חדא מן ברתוי ענת רחל ואמרת לית איפשׁר לך למיתב עימיה ארום גבר רמאי הוא אמר לא יעקב אנא רמאי וחכים יתיר מיניה ולית ליה רשׁו לאבאשׁא לי ארום מימרא דייי בסעדי וכדי ידעת ארום בר רבקה הוא ורהטת ותניאת לאבוהא    ܝܓ. והוה כדי שׁמע לבן ית שׁמע גבורתיה וחסידותיה דיעקב בר אחתיה היך נסיב ית בכירותא וית סדר ברכתא מן יד אחוי והיך אתגלי ליה ייי בביתאל והיך נדד ית אבנא והיך טפת בירא וסליקת לאנפוי ורהט לקדמותיה וגפיף ליה ונשׁיק ליה ואעליה לביתיה ותני ללבן ית כל פיתגמיא האילין    ܝܕ. ואמר ליה לבן ברם קריבי ודמי לי אנת ויתב עימיה ירח יומין    ܝܗ. ואמר לבן ליעקב המדאחי אנת חשׁיב ותיפלחינני מגן תני לי מן יהי אגרך    ܝܘ. וללבן הוון תרתין בנן שׁום רבתא לאה ושׁום זעירתא רחל    ܝܙ. ועיני לאה הוון צירנייתן דבכיא ובעיא מן -קדם ייי דלא יזמן לה לעשׁו רשׁיעא ורחל הות יאיא בריוא ושׁפירא בחיזוא    ܝܚ. ורחם יעקב ית רחל ואמר אפלחינך שׁב שׁנין בגין רחל ברתך זעירתא    ܝܛ. ואמר לבן ברמיו טב דאיתן יתה לך מן דאיתן יתה לגבר אוחרן תיב עימי    ܟ. ופלח יעקב בגין רחל שׁב שׁנין והוו דמיין בעינוי כיומין קלילין מדרחים יתה    ܟܐ. ואמר יעקב ללבן הב ית אינתתי ארום אשׁלימו יומי פולחני ואיעול לותה    ܟܒ. וכנשׁ לבן ית כל אינשׁי אתרא ועבד להון שׁירו עני ואמר להום הא שׁב שׁנין דאתא יעקב לגבן בירן לא חסרו ובית שׁקיותן סגו וכדון איתן איתו נתיעט עליה עיטא דרמיו דיימתן לגבן ועבדו ליה עיטא דרמיו לאסאבא ליה לאה חולף רחל    ܟܓ. והוה ברמשׁא ודברית לאה ברתיה ואעיל יתה לותיה ועל לותה    ܟܕ. ויהב לבן ליה ית זלפה ברתיה דילידת ליה פילקתיה ומסרה ללאה ברתיה לאמהו    ܟܗ. והוה לעידוני צפרא ואיסתכל בה והא היא לאה דכולא לילייא הוה חשׁיב דרחל היא מן בגלל דמסרת לה רחל כל מליא דמסר לה יעקב וכד חמא כן אמר ללבן מה דא עבדת לי הלא בגין רחל פלחית עימך ולמא שׁקרת בי    ܟܘ. ואמר לבן לא מתעביד כדין באתרין למיתן זעירתא קדם רבתא    ܟܙ. אשׁלים כדון שׁובעתי יומי משׁתיא דדא וניתן לך אוף ית דא בפולחנא דתיפלח עימי תוב שׁב שׁנין אוחרנין    ܟܚ. ועבד יעקב כדין ואשׁלים שׁבעתי יומי משׁתיא דלאה ויהב ליה ית רחל ברתיה לאינתו    ܟܛ. ויהב לבן לרחל ברתיה ית בלהה ברתיה דילידת ליה פילקתיה ומסרה לה לאמהו    ܠ. ועל אוף לות רחל ורחים אוף ית רחל מלאה ופלח עימיה בגינה תוב שׁב שׁנין אוחרניין    ܠܐ. וגלי קדם ייי ארום לא הוה לאה רחימתא באנפי יעקב ואמר במימריה למיתן לה בנין ורחל הות עקרה    ܠ ܒ. ואיתעברת לאה וילידת בר וקרת ית שׁמיה ראובן ארום אמרת ארום גלי קדם ייי עולבני ארום כדון ירחמנני בעלי והיכמה דאיתגלי קדם ייי עולבני היכדין יהוי גלי קדמוי עולבנהון דבניי כד יהון משׁתעבדין בארעא דמצראי    ܠ ܓ. ואתעברת תוב וילידת בר ואמרת ארום שׁמיע קדם ייי ארום שׁניתא אנא ויהב לי אוף ית דין והכדין ישׁתמע קדמוי קלהון דבניי כד יהון משׁתעבדין במצרים וקרת שׁמיה שׁמעון    ܠ ܕ. ואתעברת תוב וילידת בר ואמרת הדא זימנא יתחבר עימי בעלי ארום ילידית ליה תלתא בנין והיכדין עתידין בנוי למיהויהון מתחברין לשׁמשׁא קדם ייי בגין כן קרא שׁמיה לוי    ܠ ܗ. ואיתעברת תוב וילידת בר ואמרת הדא זימנא אודי קדם ייי דמן ברי דין עתיד למיפק מלכין ומיניה יפוק דוד מלכא דעתיד לאודויי קדם ייי בגין כן קרת שׁמיה יהודה וקמת מלמילד